دس بیبیوں کی کہانی (گیارہواں معجزہ) — عربی متن مع اردو ترجمہ | سادات
Skip to content

دس بیبیوں کی کہانی (گیارہواں معجزہ)

16 مُعْجِزے

دس بیبیوں کی کہانی (گیارہواں معجزہ)

پہلے دو (2) رکعت نمازِ حاجت ادا کریں، پھر یہ پڑھیں۔

الحمدُ للّٰہِ ربِّ العالمین، والصلاۃُ والسلامُ علیٰ خیرِ المرسلین، وآلہٖ الطیّبین الطاہرین المعصومینؑ

پھر کہانی یوں شروع کریں۔

ایک شہر میں دو بھائی رہتے تھے۔ بڑا بھائی رئیس تھا، اور چھوٹا بھائی نادار و مُفلس تھا۔ چھوٹا بھائی جب اپنی ناداری اور مفلسی کے باعث عاجز آگیا، تو اپنی بیوی سے بولا، ہم کب تک یہاں فقرو فاقہ کی مصیبت سہتے رہیں گے۔ کیوں نہ کہیں دوسرے شہر (پردیس) چلا جاؤں، شاید مجھے وہاں کوئی نوکری مِل جائے اور یہ مفلسی کے دِن دور ہوجائیں۔

یہ کہہ کر وہ اپنی بیوی سے رخصت ہوکر پردیس روانہ ہوگیا۔ بیوی اُسکے جانے کے بعد پریشان سی رہنے لگی۔ اور دِل میں کہتی تھی ، اے پالنے والے تو ہی رازق ہے۔ اَب تو میرا شوہر بھی چلا گیا۔ اَب مجھ کو کھانے کو کون دے گا۔

پھر کچھ دنوں کے بعد مجبوراً وہ مومنہ اپنے شوہر کے بڑے بھائی کے یہاں گئی اور جاکر بولی! بھائی میں کیا کروں، کہاں جاؤں۔ آپکا بھائی تو تنہا چھوڑ کر پردیس چلاگیا۔ اب سوائے آپ کے گھر کے کہاں ٹھکانہ ہے۔ وہ رئیس اپنی زوجہ سے بولا، دیکھنا یہ میری چھوٹی بھاوج آئی ہے، تم اسے یہیں رَکھو اور گھر کے کام کاج سپرد کردو۔ اب یہ یہیں رہے گی۔ غرض یہ کہ وہ مومنہ مصیبت زدہ اس کے یہاں رہنے لگی۔ اور گھر کا تمام کام، بچوں کی نگہداشت کرنے لگی۔ مگر رئیس کی زوجہ اس سے اس پر خوش نہ تھی۔ ذرا ذرا سی بات پر خفا ہوتی، طعنے دیتی۔ لیکن یہ وقت کی ماری سب کچھ سُنتی اور صبر کرتی۔ البتہ رات کو جب لیٹتی تو اپنی تباہی اور ذلت پر خوب روتی۔ اِسی طرح ایک مدّت گذر گئی۔ اکثر رات میں اپنے شوہر کی سلامتی اور واپسی کی دعائیں مانگتی۔

ایک دِن یہ مومنہ روتے روتے سوگئی اور خواب میں دیکھا کہ ’’ایک بی بی نقاب پوش تشریف لائیں اور فرمایا۔ اَے مومنہ تو اپنے شوہر کے لئے اس قدر مضطرب نہ ہو۔ انشاء اللہ تعالیٰ صحیح و سلامت آکر تجھ سے ضرور ملے گا۔اور پھر یہ بھی فرمایا کہ تو جمعرات کے دِن (کسی وقت بھی) ’’دس بیبیوں کی کہانی‘‘ ضرور سنا کر، جب تک شوہر گھر نہ آجائے۔

﴿وَإِذْ قَالَتِ الْمَلَائِكَةُ يَا مَرْيَمُ إِنَّ اللّٰهَ اصْطَفَاكِ وَطَهَّرَكِ وَاصْطَفَاكِ عَلَىٰ نِسَاءِ الْعَالَمِينَ﴾

(آیت 42، سورہ آلِ عمرانؑ، پارہ 3)

ترجمہ: اور جب فرشتوں نے کہا: اے مریم! بے شک اللہ نے تمہیں چُن لیا، تمہیں پاکیزہ بنایا، اور تمہیں تمام جہانوں کی عورتوں پر برگزیدہ فرمایا۔

اس آیت سے معلوم ہوتا ہے کہ جنابِ مریمؑ کا مرتبہ بہت بلند ہے اور بہت بڑا ہے۔ اِسلام میں چار عورتیں ایسی گذری ہیں جن کی نظیر نہیں ہے۔

پہلی سیّدہ طاہرہ فاطمۃ الزّھراء صلوات اللہ علیہا، جن کا رتبہ و دَرجہ ان سب بیبیوں سے افضل و بَرتر ہے۔

دوسری حضرت سارہؑ،

تیسری حضرت آسیہؑ (زوجۂ فرعون) یہ بنی اسرائیل سے تھیں اور دینِ ابراہیمؑ پر تھیں، اِن کے باپ کا نام مراہم تھا۔ ان کو خدا پرستی کی تعلیم ملتی تھی۔ ایسی مقدس بی بی کی شادی فرعون سے ہوئی تھی۔ شاید خدا کو منظور تھا کہ حضرت موسیٰ اور حضرت ہارون علیہم السلام کی پرورش ان کی گود میں ہو۔ نبی اللہ کی پرورش کافروں کی گود میں نہ ہو۔ شادی سے قبل فرعون انسانوں کی طرح تھا۔ بعد میں سلطنت اور خزانوں کی گرمی اور نخوت سے اپنے کو خدا کہنے لگا۔ ایک دن کہنے لگا۔ دیکھ رہا ہوں کچھ دنوں سے عجیب حالت ہے۔ حضرت آسیہؑ نے کہا کہ مجھے صدمہ ہے تو اِنسان ہوکر اپنے کو خدا کہتا اور لوگوں سے منواتا ہے۔ اِس پر فرعون نے کہا کہ کیا تو موسیٰؑ اور ہارونؑ کے خدا پر ایمان لے آئی ہے۔ آسیہؑ نے جواب میں کہا، آج چالیس سال ہوگئے۔ اُس پر فرعون بولا، تجھے میرا خوف نہیں ہے؟ آسیہؑ نے جواب دیا، مجھے تیرے خوف سے زیادہ اللہ کا خوف ہے۔ میں تجھ سے سخت متنفّر اور بیزار ہوں۔ یہ سن کر وہ آگ بگولہ ہوگیا۔ آسیہؑ کو پھر فرعون نے زمین پر لٹا کر ہاتھوں اور پیروں میں میخیں گڑوا دیں۔ کوئی اور عورت ہوتی تو چیختی چلّاتی، مگر اس بی بیؑ نے کافر کی صحبت سے موت کو ترجیح دی۔ (آسیہؑ تیرے ایمان ویقین کا کیا کہنا)۔

چوتھی عورت ہاجرہؑ جن کو حضرت ابراہیمؑ پہاڑی پر چھوڑ آئے تھے۔ ہاجرہؑ بمعہ بچۂ شیر خوار (حضرت اسمٰعیلؑ) تنہا توکّل بخدا راضی برضا رہیں۔ پانی دور دور تک نہ تھا۔ بچہ کو چھوڑ کر پانی کی تلاش میں سات مرتبہ پہاڑی پر چڑھیں اور اُتریں۔ بچہ رُوتا رہا۔ پہاڑی پر چڑھنے اور اُترنے کے اثناء، خدا نے پانی کا انتظام (بچّہ کی اِیڑیاں رَگڑنے سے) چشمۂِ زم زم کی صورت میں کردیا۔ جس سے دنیا سیراب ہوئی اور شہر آباد ہونا شروع ہوگیا۔ پھر جب حضرت ابراہیمؑ حضرت اسمٰعیلؑ کو قربان (ذبح) کرنے کے لئے لے کر چلے تو جنابِ ہاجرہؑ خاموش رہیں۔

جنابِ زینبؑ بنتِ زہراؑ علیہم السلام، کُنّبہ کی رونے والی، کُنّبہ کی سوگ نشیں، اسیرِ کربلا اور جنابِ کلثومؑ خواہرِ زینبؑ، بہترّ 72 کی سوگوار، اور جنابِ صغریٰؑ بنت الحسینؑ جو مدینہ میں اپنے کُنّبہ سے ایسی جدا ہوئیں کہ پھر نہ ملیں۔ جُدائی کی خبر سُن کر تڑپ تڑپ کے اس دُنیا سے رخصت ہوگئیں۔ جنابِ کبریٰؑ خواہرِ صغریٰؑ، اسیرِ کربلا اپنے پیاروں کی سوگوار جنابِ سکینہؑ بنت الحسینؑ نے کس قدر مظالم سہے۔ مگر یتیمی کا صدمہ نہ اُٹھ سکا۔ اپنے بھائی، بہنوں، پھوپھیوں وغیرہ کی رہائی کی تمنائیں لئے قیدِ خانۂ شام میں شہادت پائی۔

ن تمام مصیبتوں کو مدِّ نظر رکھ کر گریہ وزاری کرکے یہ کہانی سُنے یا پڑھے۔

اور قدرت کی نظرِ عنایت کا مشاہدہ کرے۔ وہ کہانی یہ ہے۔

ایک روز وصِیّ سیّد المرسلینؐ، اَمیر المومنین علیؑ ابن ابی طالبؑ نے شفیعِ محشر، حضرت محمدؐ مصطفیٰؐ کو مہمان کیا، لیکن اُس دن گھر میں کچھ نہ تھا۔ آپؑ تھوڑا ’’جَو‘‘ کہیں سے قرض لے آئے اور جنابِ سیّدہؑ نے اس کو پیس کر چھ (6) روٹیاں پکائیں۔ حضرت ختمی مرتبتؐ تشریف لائے۔ اور اپنے برادرِ عمّ، بیٹی اور نواسوں کے ساتھ دستر خوان پر بیٹھے۔ جناب سیّدہ نے ایک روٹی بی بی فِضّہ کنیز کو دی۔ اور باقی پنجتن پاکؑ میں منقسم ہوئیں۔ بعد فراغتِ طعام جنابِ سیّدہؑ نے عرض کی:

کل میری طرف سے دعوت قبول فرمائیے۔ حضورؐ نے قبول فرمالیا۔ اِسی طرح یکے بعد دیگرے دونوں نواسوںؑ نے بھی اپنے ناناؐ کو دعوت دی۔ امیرالمؤمنین حضرت علی علیہ السلام نے ہر روز سامانِ خوردونوش فراہم کیا۔ جب چوتھے دن کھانے سے فراغت پانے کے بعد حضورؐ تشریف لے چلے تو دیکھا، فِضّہ کنیز دَروازے پر کھڑی ہے۔ آپؐ نے دریافت فرمایا فِضّہ کیا کچھ کہنا چاہتی ہو؟ فِضّہ نے نہایت مُودّبانہ طریقے سے عرض کی، کنیز اِس قابل تو نہیں کہ آنحضرتؐ کو کھانے پر مدعو کرسکے ، مگر پھر بھی استدعا کرتی ہے کہ کنیز کو عزّت بخشئیے۔ یہ سُن کر پیغمبرِ خداؐ نے کنیز کی دعوت بھی قبول کرلی۔

اَلغرض آنحضرتؐ، بیٹی کے گھر معمول کے مطابق تشریف لائے۔ سب تعظیماً اُٹھ کھڑے ہوئے۔ (فِضّہ نے گھر میں کسی سے بھی ذکر نہیں کیا تھا کہ آج میں نے حضورؐ کو دعوت دی ہے)۔ نبیؐ کریم نے خود فرمایا، آج ہم فِضّہ کے مہمان ہیں۔ امیرالمؤمنین حضرت علیؑ نے چپکے سے الگ فِضّہ سے کہا، مجھ سے پہلے تو بتلا دیتی تاکہ میں انتظام کردیتا۔ فِضّہ نے اَدب سے عرض کی۔ آپ متفکّر نہ ہوں۔ اللہ تعالیٰ مسبّب الاَسباب ہے۔ اِس کے بعد وہ ایک گوشہ میں جا کر دو (2) رکعت نمازِ حاجات پڑھ کر بارگاہِ الٰہی میں دعا مانگی کہ اے قاضی الحاجات! اِس تہی دستی اور ناداری پر تو عالمِ دانا ہے۔ اِس کنیز نے تیرے حبیبؐ کو مہمان کیا ہے۔ تجھے واسطہ دیتی ہوں اُسی محبوبؐ کا اور اُسی کی آلؑ کا۔ پروردگار! مجھے شرمندہ نہ کرنا۔ ابھی دعا پوری نہ ہوئی تھی کہ دیکھا کہ سامنے ایک طبق نعمتہائے جنّت سے بھرا ہوا رکھا ہے۔ دیکھ کر فوراً سجدۂِ شکر بجالائی۔ اَور پھر اُسے حضورؐ کے سامنے رکھ دیا۔ آنحضرتؐ نے گھر کے سارے اَفراد کے ساتھ پھر تناول فرمایا۔ بعد فراغت تعام فِضّہ سے انجان ہوکر اِس طرح مخاطب ہوئے۔ فِضّہ! یہ کھانا کہاں سے آیا ہے؟ (گو آپ بخوبی واقف تھے۔ محض یہ بتانا تھا کہ ہمارے گھر کی کنیزیں بھی اللہ تعالیٰ کو اتنی پیاری ہیں کہ اُن کے سوال کو رَد نہیں کرتا)۔ محمدؐ و آلِ محمدؐ کی سچّی محبّت اور اِعتقاد سے سب کچھ مِل سکتا ہے۔ خدا کے خزانے میں کسی چیز کی کمی نہیں ہے۔

المختصر یہ کہ باوضو بہ خلوص نیّت یہ کہانی پڑھ یا سُن۔ اور جب تیرا شوہر آجائے تو میٹھی روٹی کا مَلِیدہ بنا کر اس کے ’’دس لڈو‘‘ بنا اور اس پر دَس بیبیوں کی نذر دے۔ اس مومنہ نے عرض کی، آپ کون ہیں؟ اور آپ کا کیا نام ہے۔ اور ان بیبیوں کے ناموں سے بھی آگاہی بخشیئے۔ تاکہ میں اُن کی نذر دِلائوں ۔ یہ سُن کر۔ جنابِ سیدہؑ نے فرمایا، میرا نام ’’فاطمہ زہراؑ‘‘ ہے اور میرے والد کا نام، محمد مصطفیٰؐ ہے۔ اور نو (۹) بیبیوں کے نام یہ ہیں:

۱۔ جنابِ سارہؑ۔ ۲۔ جنابِ حاجرہؑ۔۳۔ جنابِ مریمؑ۔ ۴۔ جنابِ آسیہؑ اور میری بیٹیاں۔ ۵۔جنابِ زینبؑ۔ ۶۔ جنابِ اُمِ کلثومؑ۔ ۷۔جنابِ فاطمہ کبریٰؑ۔ ۸۔ جنابِ فاطمہ صغریٰؑ۔ ۹۔ جنابِ سکینہؑ۔

جب وہ مومنہ خواب سے بیدار ہوئی تو وہ جمعرات کا دِن تھا۔ محلہ میں چند عورتوں سے یہ خواب بیان کیا اور پھر جنابِ سیّدہؑ کی کہانی سُنائی۔ اور اسی طرح سناتی رہی جب تک اُس کا شوہر نہ آگیا۔ ایک دِن اس کا شوہر اپنے ساتھ بہت مال و اسباب لئے وارد ہوگیا۔ مومنہ خوش ہوئی اور اپنے سابقہ مکان میں چلی آئی۔ اور یہاں آکر ہدایت کے مطابق بہ خلوص نیت لڈؤں پر نذر دِلائی۔ اور لڈو تقسیم کئے اور انہیں لڈؤں میں سے لے کر اپنے شوہر بڑے بھائی کے گھر پہنچی۔ اور شوہر کے بھاوج کو دیا اور ساری کیفیت مختصراً بیان بھی کردی۔ اُس مغرور بھاوج نے وہ لڈو فوراً واپس کرتے ہوئے کہا۔ یہ لے جائو ، ہم ایسی اینٹ ،پتھر، چیزیں نہیں کھاتے۔ بیچاری مومنہ وہ لڈو واپس لے آئی اور باحترام خود نے کھا کر خدا کا شکر ادا کیا۔ اب اُس مغرور بھاوج کا حال سُنیئے۔

رات کو وہ مغرور عورت سوئی۔ صبح کو جب اُٹھی تو کیا دیکھتی ہے کہ اُسکے سارے بچّے مَرے پڑے ہیں۔ اور گھر کا سامان کُل غائب ہے۔ یہ دیکھ کر میاں، بیوی کے حواس جاتے رہے۔ دونوں بہت روئے۔ جب کئی دِن گذر گئے تو پھر آپس میں کہنے لگے۔ یا اللہ! اب بھوک سے بُرا حال ہورہا ہے۔ کیا کروں، گھر میں ایک دانہ بھی نہیں کہ کچھ کھائوں۔ بِالآخر شوہر نے بیوی سے کہا، میری بہن کے یہاں چلو۔ گھر میں تالا لگا کر دونوں چل دئیے۔ راستہ میں چنے کے ہَرے بھرے کھیت نظر آئے۔ اُس کے شوہر نے بہت سے ہُولے (ہَرے چنے کے پیڑ) اُکھاڑ کر بیوی کے ہاتھ میں دیئے۔ عورت کے ہاتھ میں وہ ہُولے فوراً سوکھ سوکھ کر گھاس ہوگئے۔ دونوں بہت گھبرائے اور پھینک کر آگے بڑھے۔ کچھ دور چل کر ایک تروتازہ گنّے کا کھیت ملا۔ شوہر بھوک اور پیاس سے بیتاب تھا۔ گنّے دیکھ کر اور بے قرار ہوگیا، پھر اس نے بہت سارے گنّے کھیت سے توڑ کر بیوی کو دئیے۔ جونہی عورت کے ہاتھ سے مَس ہوئے سارے سوکھ کر لکڑیاں بن گئے۔ انہیں بھی پھینک کر آگے بڑھ گئے۔ بہت مشکل سے بہن کے گھر پہنچے۔ الگ کمرے میں بیٹھایا گیا۔ پہلے گھر والوں نے کھانا کھایا۔ بہن نے بچا کُھچا نوکر کے ذریعہ ان کو کھانا پہنچوایا۔ یہ دونوں کئی دِن کے بھوکے تھے۔ کھانا دیکھ کر بہت خوش ہوئے۔ پھر دونوں کھانے بیٹھے۔ جیسے ہی پہلا نوالہ اُٹھایا۔ شدید بدبو آئی۔ اور دونوں سر پکڑ کر بیٹھ گئے۔ بِالآخر بھوکے سوگئے۔ صبح ہوئی تو شہر نے بیوی سے کہا کہ یہاں پر جو بادشاہ ہے، وہ میرا دوست ہے۔ چلو اُس کے یہاں چلیں۔ دیکھو اس مصیبت میں وہ ہماری کیا مدد کرتا ہے۔ دونوں بادشاہ کے یہاں پہنچے۔ خبردار نے اِطّلاع دی کہ حضور آپ کے پاس ایک مرد اور عورت آئے ہیں۔ بہت خستہ حالت میں ہیں۔ بادشاہ نے اندر بُلالیااور دیکھتے ہی پہچان لیا۔ بڑے تپاک سے مِلا۔ پھر ان کے لئے ایک کمرہ خالی کرایا اور کہا دونوں غسل کرکے آرام کرو۔ بادشاہ نے حُکم دیا کہ ہمارے مہمانوں کو سات قسم کا کھانا بھیجو۔ بادشاہ کے حکم کے مطابق سات خوان ان دونوں کے لئے لائے گئے۔

شوہر بہت خوش ہوا۔ بیوی سے بولا، جلدی اُٹھو۔ اللہ نے ہم کو نعمت بھیجی ہے، بیوی ہاتھ دُھو کر کھانے کے پاس آبیٹھی۔ جیسے ہی کھانے کو ہاتھ لگایا۔ کھانا سڑگیا۔ اور کیڑے چلتے پھرتے نظر آنے لگے۔ اُس کا شوہر حیران رہ گیا کہ یہ ماجرا کیا ہے۔ اگر بادشاہ سے شکایت کرتے ہیں تو وہ ناراض ہوجائے گا کہ میں نے تازہ کھانا بھیجا اور تم بدنام کرتے ہو۔ شوہر بہت گھبرایا، بیوی سے کہنے لگا۔ اَب کیا کروں، اتنا بہت سا کھانا سڑگیا۔ بادشاہ کہے گا کہ ان لوگوں نے جادو کیا ہے۔ غرض یہ کہ دونوں نے کھانا زمین میں دَفن کردیا اور نوکروں سے برتن واپس کرا دیئے۔ اور دونوں کے پریشانیوں میں یوں ہی اضافہ ہوتا رہا۔ مگر کچھ سمجھ میں نہیں آتا تھا۔ بیوی اِسی اُلجھن میں صحن میں جا بیٹھی۔ اتنے میں شہزادی اور ملکہ غسل کرنے جانے لگیں، اور صحن کے قریب کے کھونٹی پر دونوں نے اپنے ہار لٹکا دئیے۔ لٹکاتے ہی وہ دونوں ہار غائب ہوگئے۔ یہ عورت نے بھی دیکھا اور فوراً شوہر سے بولی اب خدا خیر کرے۔ شوہر نے پوچھا، کیا ہوا۔ بیوی نے سارا واقعہ ہاروں کے فوراً غائب ہوجانے کا بیان کردیا، اور یہ بھی کہا کہ اب یہاں سے جلدی نکل چلو۔ کہیں ایسا نہ ہو کہ بادشاہ کہیں ہم پر اِلزام لگا کر ہم دونوں کو قید یا قتل کرادے۔ چنانچہ یہ دونوں بغیر اِطلاع دئیے۔ محل سے چل دئیے۔ چلتے چلتے ایک دریا کے کنارے پہنچے اور سُستانے کی غرض سے بیٹھ گئے۔ شوہر نے بیوی سے کہا، نہیں معلوم ہم سے کیا خطا ہوگئی ہے جو ہم پر ایسا عتاب نازل ہے۔ بیوی بولی، یہی میں کہتی ہوں کہ ضرور کوئی گناہ مجھ سے سرزد ہوا ہے۔ بہرحال اِسی غور و کفر کے بعد بیوی نے شوہر سے کہا۔

ایک مرتبہ جب تمہارا بھائی تلاش معاش کیلئے پردیس گیا تھا اور عرصہ دراز تک لاپتہ رہا۔ تمہارے بھائی کی بیوی جب بہت پریشان ہوئی تو ہمارے یہاں آکر رہنے لگی۔ کچھ دنوں بعد اس نے خواب دیکھا کہ ایک بی بی نقاب پوش آئیں اور بولیں کہ اَے مومنہ! تو ’’دس بیبیوں کی کہانی‘‘ سُن یا پڑھ۔ انشاء اللہ جلد تیرا شوہر آجائے گا اور اپنے ساتھ بہت سا مال و زَر بھی لائے گا۔ پریشان نہ ہو۔ خواب کے بعد تمہاری بھاوج برابر ’’کہانی‘‘ سُنتی رہی۔ یہاں تک کہ تمہارا بھائی آگیا۔ تمہاری بھاوج نے حسبِ ہدیات نقاب پوش بی بی، بہ خلوص نیّت ملیدہ کے لڈوں پر نذر دِلوائی۔ اور پھر تقسیم کئے۔ مجھے لڈو دینے آئی۔ میں نے لینے سے نہ صرف اِنکار کیا بلکہ یہ بھی کہا ’’میں ایسے اینٹ ، پتھّر کھانے والی نہیں ہوں۔‘‘ وہ چُپکی لڈو لئے واپس چلی گئی۔ میں سمجھتی ہوں اُس کے بعد ہی سے ہم پر یہ مصیبت نازل ہوئی ہے۔ شوہر نے کہا، اَے بدنصیب! تو نے ایسے غرور اور تکبّر کے کلمات کہے۔ جلدی توبہ کر اور معافی مانگ تاکہ ہم لوگ اس آفت اور مصیبت سے نجات پائیں، ورنہ تباہ ہوجائیں گے۔اس عورت نے پھر اسی دریا میں غسل کرکے نمازِ حاجات پڑھی اور رُو رُو کر دعا مانگے کے لئے ہاتھ اُٹھائے اور بولی، اَے بنتِ رسولؐ اللہ! اس مصیبت کے عالم میں مدد فرمائیے۔ اور میری گستاخی کو معاف کردیجئے۔ شوہر کہنے لگا ہمارے پاس تو کچھ بھی نہیں ہے ہم کس طرح نذَر دِلائیں۔ پھر یہ کہہ کر اُس نے ریت اکٹھا کرکے اس کے دس لڈو بنائے۔ پھر بہ خلوص نیّت ’’دس بیبیوں کی نذر‘‘ کا اِرادہ کیا تھا۔ کہ وہ لڈو سارے موتی چور کے ہوگئے اور اُس نے اُن پر نذر دی۔ دونوں نے درود پڑھ کے لڈو کھائے، پانی پیا، شکرِ الٰہی ادا کیا۔ شوہر نے پھر کہا اب گھر چلو ہماری خطا عفو ہوگئی ہے۔

اب وہ گھر پہنچے تو دیکھا، مکان اصلی حالت پر ہے، بچے زندہ ہیں۔ نوکر اپنے اپنے کام پر مامور ہیں۔ ہر چیز اپنی جگہ موجود ہے۔ بچے تلاوت قرآن مجید کررہے ہیں۔ ماں باپ نے بچوں کو سینے سے لگالیا۔ اور بہت خوش ہوئے۔

اَے پاک اور مقدس بیبیوںؑ! جس طرح آپ نے اُس عورت کی خطا معاف کی اُس طرح کل مومنات کی خطائیں عفو ہوں اور سب کی دلی مُراد بھی بَر آئیں۔

کاؤنٹر، آڈیو اور آف لائن مطالعہ ایپ میں دستیاب ہے۔

سادات کو ساتھ رکھیں

مکمل تجربہ — آف لائن مطالعہ، آڈیو، یاد دہانیاں اور بک مارکس — ایپ میں ہے۔

Get it on Google Playجلد آ رہی ہےDownload on the App Store