حضرت امام موسیٰ کاظمؑ (دسواں معجزہ)
منقول ہے کہ جس شخص پر اللہ جل شانہ کا کوئی اِنعام ہو اُس کو ضروری ہے کہ اس کا شُکر ادا کرے اور جس پر رِزق میں تنگی ہو وہ اِستغفار کی کثرت کرے اور جس کو کوئی پریشانی ہو وہ لاحول ولا قوۃ الا باللہ پڑھا کرے۔
حضرت شفیق بلخیؒ فرماتے ہیں کہ میں 149 میں حج کو جارہا تھا، راستہ میں قادسیہ (ایک شہر کا نام ہے) میں اُترا۔ میں لوگوں کی زیب و زینت اور اُن کا ہجوم اور کثرت دیکھ رہا تھا۔ میری نظر ایک نوجوان خوبصورت پر پڑی کہ اُس نے کپڑوں کے اوپر ایک بالوں کا کپڑا پہن رکھا تھا۔ پاؤں میں جوتا بھی تھا اور سب سے علیحدہ بیٹھا تھا۔ میں نے خیال کیا کہ یہ لڑکا صوفی قِسم کے آدمیوں میں سے معلوم ہوتا ہے کہ راستہ میں دوسروں پر بوجھ ہی بنے گا۔ میں اس کو جا کر فہمائش کروں، اس خیال سے میں اُس کے قریب گیا۔ جب اس نے مجھے اپنی طرف آتے دیکھا، کہنے لگا، اے شفیق!
يَا أَيُّهَا الَّذِينَ آمَنُوا اجْتَنِبُوا كَثِيرًا مِنَ الظَّنِّ إِنَّ بَعْضَ الظَّنِّ إِثْمٌ
(آیت 12، سورہ حجرات، پارہ 26)
یعنی بدگمانی سے بچو، بعض گمان گناہ ہوتے ہیں
اور یہ کہہ کر مجھے چھوڑ کر چل دیا۔ میں نے سوچا کہ یہ تو بڑی مشکل بات ہوگئی۔ میرا نام لے کر (حالانکہ مجھ کو جانتا بھی نہیں)۔ میرے دِل کی بات کہہ کر چل دیا یہ تو کوئی بزرگ آدمی ہے۔ میں اُس کے پاس جاکر اپنے گمان کی معافی مانگوں۔ میں جلدی جلدی اس کے پیچھے چلا مگر وہ میری نظروں سے غائب ہوگیا۔ پتہ نہ چلا۔ جب ہم رافصہ پہنچے تو دفعتاً اس پر نظر پڑی کہ وہ نماز پڑھ رہا ہے اور اس کا بدن کانپ رہا ہے، آنسو بہہ رہے ہیں۔ مَیں نے اُس کو پہچان لیا اور اُس کی طرف بڑھا تاکہ اپنے اس گمان کی معافی مانگوں۔ مگر مَیں نے اس کی نماز سے فراغت کا انتظار کیا اور جب وہ سلام پھیر کر بیٹھا تو میں اُس کی طرف بڑھا، جب اُس نے مجھ کو اپنی طرف آتے ہوئے دیکھا تو کہنے لگا۔ اَے شفیق! پڑھو!
اور بِلا شبہ مَیں بڑا بخشنے والا ہوں، ایسے لوگوں کا جو توبہ کر لیں اور ایمان لے آئیں اور پھر سیدھے راستہ پر قائم رہیں۔ یہ آیت پڑھ کر وہ پھر چل دیا۔ میں نے کہا کہ یہ شخص تو ابدال میں سے معلوم ہوتا ہے۔ دو مرتبہ میرے دل کی بات پر مُتَنّبہ کرچکا۔ پھر جب ہم زیالا میں پہنچے تو دَفعۃً میری نظر اُس جوان پر پڑی کہ وہ ایک کنویں پر کھڑا ہے۔ ایک بڑا سا پیالہ اُس کے ہاتھ میں ہے اور کنویں سے پانی لینے کا اِرادہ کررہا تھا کہ وہ پیالہ کنویں میں گِر گیا۔ میں اس کی طرف دیکھ رہا تھا اُس نے آسمان کی طرف دیکھا اور ایک شعر پڑھا۔ جس کا ترجمہ یہ ہے کہ تو ہی میرا پرورش کرنے والا ہے۔ جب میں پیاسا ہوں پانی سے اور تو ہی میری روزی کا ذریعہ ہے ۔ جب میں کھانے کا ارادہ کروں۔ اس کے بعداُس نے کہا اَے میرے اللہ تجھے معلوم ہے۔ اَے میرے معبود، میرے آقا کہ اِس پیالہ کے سِوَا میرے پاس کچھ نہیں ہے۔ پس اس پیالہ سے مجھے محروم نہ کر۔
وَإِنِّي لَغَفَّارٌ لِمَن تَابَ وَآمَنَ وَعَمِلَ صَالِحًا ثُمَّ اهْتَدَىٰ
(آیت 82، سورہ طٰہ، پارہ 16)۔
ترجمہ:اور بے شک میں بہت بخشنے والا ہوں اس شخص کے لیے جو توبہ کرے، ایمان لائے، نیک عمل کرے، پھر سیدھی راہ پر قائم رہے۔
شفیق کہتے ہیں: خدا کی قسم میں نے دیکھا کہ کنویں کا پانی اوپر کو آگیا۔ اس نے ہاتھ بڑھایا اور پانی سے بھرا پیالہ کنویں سے نکال لیا۔ پھر وضو کرکے چار رکعت نماز پڑھی۔ اس کے بعد ریت اکٹھی کرکے ایک ایک مٹھی بھر کر اس پیالے میں ڈالتا جاتا تھا اور اس کو ہلا کر پی رَہا تھا۔ میں اُس کے قریب گیا اور سلام کیا۔ اُس نے سلام کا جواب دیا۔ میں نے کہا، اللہ نے جو نعمت تمہیں عطا کی ہے اُس میں سے کچھ اپنا بچا ہوا مجھے بھی کھلا دیجئے،
کہنے لگا کہ شفیق! اللہ جل شانہ کی ظاہری اور باطنی نعمتیں ہم پر رہی ہیں۔ اپنے رَبّ کے ساتھ نیک گمان رکھو۔ یہ کہہ کر وہ پیالہ مجھے دے دیا۔ میں نے جو اُس کو پیا تو خدا کی قسم سَتُّو اور شکر گھلی ہوئی تھی۔ اُس سے زیادہ خوش ذائقہ اور اس سے زیادہ خوشبو دار چیز میں نے کبھی نہیں کھائی تھی۔ میں نے خوب پیٹ بھر کر پیا۔ جس کی برکت سے کئی دن تک نہ تو مجھے بھوک لگی نہ پیاس لگی۔ اس کے بعد مکہّ مکرّمہ داخل ہونے تک میں نے اُس کو نہیں دیکھا۔ جب ہمارا قافلہ مکّہ مکّرمہ پہنچ گیا تو میں نے قبّۃ الشّراب کے قریب ایک مرتبہ آدھی رات کے قریب نماز پڑھتے دیکھا۔ بڑے خشوع سے نماز پڑھ رہا تھا اور خوب رُو رہا تھا۔ صبح تک اسی طرح نماز پڑھتا رَہا۔ جب صبح صادق ہوگئی تو بھی اُسی جگہ بیٹھا تسبیح پڑھتا رہا۔ اس کے بعد صبح کی نماز پڑھی۔ اور پھر بیت اللہ کا طواف کیا۔ پھر وہ باہر جانے لگا تو میں اُس کے پیچھے لگ گیا، باہر جاکر دیکھا تو راستہ میں جس حالت پر دیکھا تھا اس کے بِالکل خلاف بڑے نوکر چاکر اس کے موجود ہیں، چاروں طرف سے گھیر رکھا ہے۔ سلام کرکے حاضر ہورہے ہیں۔ میں نے ایک شخص سے جو میرے قریب تھا۔ دریافت کیا کہ یہ بُزرگ کون ہیں۔ اُس نے بتایا کہ یہ حضرت موسیٰ بن جعفرؑ یعنی حضرت جعفر صادقؑ کے صاحبزادے ہیں۔ مجھے تعجب ہوا اور میں نے کہا کہ یہ عجائب واقعی ایسے ہی سیَد کے لئے ہونا چاہئیں۔ (کتابِ روض)۔