جناب سیدہؑ کی کہانی (پہلا معجزہ) — عربی متن مع اردو ترجمہ | سادات
Skip to content

جناب سیدہؑ کی کہانی (پہلا معجزہ)

16 مُعْجِزے

جناب سیدہؑ کی کہانی (پہلا معجزہ)

مشہور روایت ہے کہ عرب کے کسی شہر میں ایک سُنارن رہتی تھی جس کے صرف ایک ہی لڑکا تھا۔ ایک روز جب سُنارن کنوئیں پر پانی بھرنے گئی تو اُس کا لڑکا بھی اُس کے ساتھ ہو لیا۔ سُنارن لڑکے کو کنوئیں کے قریب بٹھا کر پانی بھرنے لگی۔ کنوئیں کے دوسری طرف ایک کمہار رہتا تھا۔ جس کا آوا اس وقت خوب روشن تھا۔ لڑکا کھیلتے کھیلتے اس طرف نکل گیا۔ سُنارن جب پانی بھرچکی تو کنوئیں کے قریب لڑکے کو نہ پاکر خیال کیا کہ گھر چلا گیا ہوگا۔ واپس گھر پہنچی تو گھر پر بھی لڑکا موجود نہ ملا۔ آخر ماں تھی، بہت پریشان ہوئی اور روتی پیٹتی اپنے لختِ جگر کی تلاش میں دوبارہ گھر سے نکلی۔ کنوئیں کے قریب آئی۔ جگہ جگہ ڈھونڈا۔ سرگردان و پریشان پھرتی رہی، ہر ایک سے پوچھا۔ مگر کوئی سراغ نہ ملا۔ کہیں پتہ نہ چلا۔ اسی طرح شام ہوگئی۔ یکایک شور ہوا کہ سُنارن کا لڑکا کمہار کے آوے میں گر کر جل گیا ہے۔ یہ سُن کر اُسے انتہائی صدمہ ہوا اور اس قدر روئی کہ غش آگیا۔

عالمِ غش میں کیا دیکھتی ہے کہ ایک معظمہ نقاب پوش تشریف لائی ہیں (صلوات)۔ اور فرماتی ہیں کہ غم نہ کھا۔ تیرا لڑکا بہت جلد تجھ سے ملے گا۔ تو نیت کر لے کہ اگر میرا لڑکا صحیح و سالم آوے میں سے زندہ کھیلتا کودتا نکل آئے، تو میں جنابِ سیدہ سلام اللہ علیہا کی کہانی سنوں گی۔ سُنارن نے فوراً عالمِ غشی میں ہی نیت کرکے منت مان لی۔ جب آنکھ کھلی تو واقعی سُنارن نے دیکھا کہ لڑکا خدا کے فضل و کرم سے ہنستا کھیلتا زندہ سلامت چلاآرہا ہے، اور اعجازِ جنابِ سیدہؐ سے اس کے جسم پر آگ نے کوئی اثر نہیں کیا۔ یہاں تک کہ لباسِ بدن بھی بالکل محفوظ رہا۔

اَللّٰھُمَ صَلِّ عَلٰی مُحمَّدٍ وَّاٰلِ مُحَمَّدٍ

سُنارن بچے کو لے کر خوشی خوشی بازار گئی۔ دو پیسے کی شیرینی مول لی اور پڑوسیوں سے کہا کہ میری مُراد پوری ہوئی ، میرے گھر چل کر جنابِ سیدہؑ سلام اللہ علیہا کی کہانی مجھے سنا دو، اگر کسی کو یاد ہو۔ چھ سات گھر پھری لیکن ہر ایک نے یہی کہا کہ نہ ہمیں کہانی یاد ہے اور نہ اتنی فرصت کے فضول باتوں کی طرف توجہ دیں۔ سنارن سب سے مایوس ہو کر جنگل کی طرف چل دی، کچھ دور چل کر وہی نقاب پوش معظمہ نظر آئیں اور فرمایا کہ اے خاتون مت رو۔ چادر بچھا کر بیٹھ جا۔ میں کہانی کہتی ہوں۔ تو سُن۔ پھر آپؑ نے فرمایا کہ شہر مدینہ میں ایک یہودی رہتا تھا۔ اس کی لڑکی کی شادی تھی۔ وہ یہودی جنابِ رسولِ خداؐ کی خدمت میں آیا اور کہنے لگا کہ میری لڑکی کی شادی ہے آپؐ اجازت دیں تو میں شرف پاؤں کہ جناب سیدہؐ میرے گھر تشریف لے جائیں۔ آپؐ نے فرمایا کہ اس امر کے مالک علیؑ ہیں، یہ سُن کر وہ امیرالمؤمنین حضرت علیؑ کی خدمت میں حاضر ہوا اور عرض کیا کہ آپؑ اجازت دیں جنابِ سیدہؐ میرے گھر تشریف لے چلیں۔ آپؑ نے فرمایا کہ اس امر کی مالک خود جنابِ سیدہؐ ہیں۔ اس کے بعد یہودی نے جنابِ سیدہؐ کے دروازے پر آواز دی۔ کہ اے بنتِ رسولؐ، میری لڑکی کی شادی ہے، اگر آپؑ تشریف لے چلیں تو میری عزت بڑھ جائے گی۔ آپ ؑنے فرمایا کہ جنابِ امیر علیہ السلام سے اجازت لے لوں تو چلوں۔ یہودی نے کہا میں رسولِ خداؐ اور حضرت شیرِ خداؑ کی خدمت میں گیا تھا، سب ہی نے آپؑ کو مختار کیا ہے۔ جنابِ سیّدہؑ یہ سُن کر متفکّر ہوئیں، اتنے میں جنابِ رسولِ خداؐ خود تشریف لے آئے۔ جنابِ سیّدہؑ نے فرمایا: بابا جان! یہودی کے یہاں سے آدمی آیا ہے ، آپؐ کیا فرماتے ہیں، اس کے گھر جائیں یا نہ جائیں۔ آپؐ نے فرمایا ! اے بیٹی ، تم کو اختیار ہے۔ جنابِ سیّدہؐ نے عرض کیا۔ بابا جان! آپؐ کی سخت توہین ہوگی کیونکہ ان کی عورتیں عمدہ اور نفیس لباس و زیورات سے مزیّن ہوں گی اور میرے پاس وہی پھٹے پرانے کپڑے ہیں، جس میں جا بجا خرمے (کھجور) کے پیوند لگے ہیں۔ رسولِ خداؐ نے فرمایا، اے بیٹی! اسی حالت میں جائو جو مرضیٔ معبود۔ چنانچہ جنابِ سیّدہؑ جانے کو تیار ہوگئیں۔ اپنی ڈیوڑھی تک نہ پہنچی تھیں کہ حورانِ جنّت آسمان سے نازل ہوئیں، اور جنابِ سیّدہؑ کو زیورات و خلعت سے آراستہ کیا اور اپنا جلوس لے کر جنابِ سیّدہؑ کو روانہ کیا۔ کچھ حوریں دائیں اور بائیں اور کچھ پیچھے اور کچھ آگے روانہ ہوئیں۔ اس شان سے جنابِ سیدہؑ کی سواری یہودی کے مکان پر پہنچی، جونہی آپؑ یہودی کے مکان پر پہنچیں ، تمام مکان آپؑ کے نور سے روشن ہوگیا اور ایسی خوشبو پھیلی کہ دور دور تک خوشبو محسوس ہونے لگی۔ یہ تجمل و وقار دیکھ کر تمام یہود عورتیں بیہوش ہوگئیں۔ تھوڑی دیر کے بعد سب کو ہوش آیا، مگر دلہن کو ہوش نہ آیا۔ لاکھ تدبیریں کیں مگر سب بے سود ثابت ہوئیں۔ دیکھا گیا تو معلوم ہوا کہ روح قفسِ عنصری سے پرواز کرچکی ہے۔ آناً فاناً شادی کا مکان ماتم کدہ بن گیا۔

جنابِ سیّدہؑ کو یہ دیکھ کر بہت تشویش ہوئی اور فرمایا کہ اطمینان رکھئے، ابھی ہوش آجاتا ہے، اس کے بعد آپؑ نے فوراً دو رکعت نماز پڑھ کر دعاء کے لئے ہاتھ بلند کئے اور کہا کہ اے میرے معبود میں بنتِ رسولؐ ہوں۔

صدّیقہ نام رکھا ہے تو نے بتولؐ کا، جھوٹا نہ کرنا مجھے صدقہ رسولؐ کا۔

اے میرے معبود برحق! میں تیرے رسولؐ کی بیٹی ہوں۔

میری عزت تیرے ہاتھ ہے، تمام لوگ یہی کہیں گے کہ سیّدہؑ کے آتے ہی دلہن ختم ہوگئی، خانۂِ شادی خانۂِ غم بن گیا۔

کچھ دیر نہ گذری تھی کہ آپؑ کی دعا قبول ہوئی۔اور دلہن کلمہ شہادت پڑھتی ہوئی اُٹھ بیٹھی۔

اَللّٰھُمَ صَلِّ عَلٰی مُحمَّدٍ وَّاٰلِ مُحَمَّدٍ

کہنے لگی میں شہادت دیتی ہوں کہ خدا واحدہ لاشریک ہے، حضرت محمد مصطفیؐ رسولِ برحق ہیں، آپؑ ان کی دختر ہیں۔ آپؑ مجھ کو مذہب اسلام کی تعلیم فرمائیں۔ اور اسی طرح صدق دل سے وہ عورت مسلمان ہوگئی۔ جنابِ فاطمہؑ زہراؑ کا یہ اعجاز دیکھ کر پانچ سو (500) یہودی مرد و عورت مسلمان ہوگئے اور آپؑ کو سب نے نہایت عزت و حرمت کے ساتھ رخصت کیا۔ ایک عورت آپؑ کی کنیزی میں دی۔ آپؑ اپنے دولت خانہ پر واپس تشریف لے آئیں۔ سارا ماجرا جنابِ رسولِ خداؐ سے بیان کیا۔ رسالتمآبؐ نے بھی خدا کا شکر ادا کیا۔

کہانی کا پہلا حصہ ختم ہوا۔ معظمہؑ نے دوسرا حصہ شروع کیا۔ سُنارن نہایت دلچسپی اور اعتقاد سے سنتی رہی۔

کاؤنٹر، آڈیو اور آف لائن مطالعہ ایپ میں دستیاب ہے۔

سادات کو ساتھ رکھیں

مکمل تجربہ — آف لائن مطالعہ، آڈیو، یاد دہانیاں اور بک مارکس — ایپ میں ہے۔

Get it on Google Playجلد آ رہی ہےDownload on the App Store