چَٹ پَٹ بی بیؑ کی کہانی (پندرہواں معجزہ)
ایک نصرانی عورت تھیں۔ گھر کی غریب اور گودی بھی اولاد سے خالی، گھر میں صرف شوہر کے اور کوئی نہ تھا۔ شوہر محنت مزدوری کرکے جو دن بھر پاتا تھا اسی میں کھانے پینے کا انتظام کرتا تھا۔ یونہی گذر بسر ہوتی تھی۔ زیادہ تر فاقہ سے بسرہوتی تھی۔ لیکن میاں بیوی دونوں خدا پر شاکر رہ کر صبر سے کام لیتے تھے۔ رفتہ رفتہ عمر بھی گذرتی گئی۔ اب ضعیفی کا وقت آنے لگا۔
دل افسردہ رہتا تھا۔ کیونکہ ان کے بعد آئندہ نسل باقی رہنے کی اُمید نہ تھی، ایک دن ایک ضعیفہ بی بی تشریف لائیں۔ پوچھا، کیوں بی بی نصرانی! تم کیوں آج کل اتنی غمگین رہا کرتی ہو، کوئی خاص بات ہو تو بیان کرو۔ یہ تو معلوم ہے کہ ضعیفی و غریبی ساتھ نہیں چھوڑتی ہے۔ اس کا تم کو غم بھی نہیں ہے۔ ہمیشہ تم نے صبروشکر سے زندگی بسر کی ہے۔ اب کیا نئی بات ہے؟
بی بی نصرانی نے جواب دیا۔ بی بی کیا کہوں ، قسمت کی بات ہے۔ غریبی تو غریبی ہی ہے، میں اِس عمر تک اولاد سے بھی محروم ہوں۔ بی بی ضعیفہ نے کہا، بیٹی غم نہ کرو۔ اللہ کے اختیار میں سب کچھ ہے ، وہ چاہے جسے مُردہ کردے جسے چاہے زندہ کردے، سوکھے درخت کو ہرا کردے، بے اولاد کو صاحبِ اولاد کردے۔
اچھا تم چَٹ پَٹ بی بی کی کہانی مان لو۔ خداوندتعالیٰ تمہاری یہ مشکل آسان کردے گا۔ یہ کہہ کر بی بی ضعیفہ تشریف لے گئیں۔ نصرانی بی بی نے فوراً کہانی مان لی۔ خدا نے اس کو ایک فرزند حَسِین و جمیل عطا فرمایا۔ اولاد سے گھر آباد ہوگیا۔ نصرانی بی بی کو منّت پوری کرنے کا خیال آیا۔ فکرمند ہوئی کہ کیونکر منّت پوری کروں۔ ضعیفہ سے ترکیب بھی نہ پوچھی کہ جب منّت پوری ہوجائے تو کس طرح منّت اُتاری جائے۔ اتنے میں شام ہونے لگی۔ دیکھا کہ ایک نقاب پوش ضعیفہ تشریف لائیں، اور بولیں ، تم نے ابھی تک منّت نہیں اُتاری؟نصرانی عورت اُن کے قدموں پر گرپڑی اور گِڑ گِڑا کر بولی! میں آپ کو برابر یاد کر تھی۔ خدا کا شکر ہے آپ تشریف لے آئیں۔ آپ کی بتلائی ہوئی منّت سے آج میری گود میں ایک بچہ نظر آرہا ہے۔مگر میں نے آپ سے منّت اُتارنے کی ترکیب نہیں پوچھی تھی۔ اب آپ بتائیں کیونکر منّت اُتاروں؟ بی بی ضعیفہ نے کہا، پانچ ڈلی (روٹی) منگائو اور کہانی جو کہوں وہ بغور سُن لو۔ ڈلی کو کاٹ ڈالو۔ کہانی کہنے والے کو دو (2) حصہ، کہانی سننے والے کو بھی دو (2) حصہ اور لانے والے کو ایک (1) حصہ تقسیم کر دو۔ پھر بی بی ضعیفہ نے کہانی سنانی شروع کردی۔
ایک روز امیرالمؤمنینؑ کچھ آٹا جو کا لائے اور جناب فاطمہؑ زہراؑ کو دیا کہ اس کی روٹیاں تیار کرو۔ آج تمہارے پدربزرگوار(رسولِ خداؐ) کو میں نے کھانے پر مدعو کیا ہے۔ جنابِ سیّدہؑ نے خوشی خوشی آٹا خمیر کیا اور روٹیاں تیار کیں۔ جناب رسولِ خداؐ بعد نماز مغرب تشریف لائے۔ جناب سیّدہؑ نے دسترخوان لگایا۔ محسن باپؐ نے ایک ساتھ کھانا تناول فرمایا۔ اور جب پیغمبرِاکرمؐ رخصت ہونے لگے تو جنابِ سیّدہؑ نے عرض کی بابا جان! اسی طرح کل میری طرف سے کھانا نوش فرمائیے گا۔ آنحضرتؐ نے قبول فرمایا۔ پھر امیرالمؤمنین حضرت علیؑ کہیں سے جَو کا آٹا لائے اور جناب سیّدہؑ نے کھانا تیار کیا۔ بعدِ نمازِ مغرب پھر رسولِ خداؐ تشریف لائے اور سب کے ساتھ کھانا کھایا۔ جب آپؐ واپس جانے لگے تو حضرت امام حسنؑ نے نہایت ادب سے عرض کی نانا جان! میری طرف سے بھی دعوت قبول فرمائیے۔ ارشاد ہوا ، اچھا بیٹا، تمہاری دعوت بھی قبول ۔ پھر کھانے کے انتظامات ہوئے اور جنابِ رسولؐ کریم تشریف لائے اور کھانا تناول فرمایا۔ جب واپسی کا ارادہ کیا، توحضرت امام حسینؑ نانا جان کے گلے میں بانہیں ڈال دیں اور بولے نانا جان کیا مجھ کو محروم رکھیے گا؟ نانا سمجھ گئے، فرمایا بیٹا حسینؑ تمہاری بھی دعوت قبول ہے۔ چنانچہ حسبِ دستور پھر سامان کھانے کے فراہم ہوئے۔ اور نبیؐ کریم تشریف لائے۔ جب کھانے وغیرہ سے فراغت پاکر آپؐ رخصت ہونے لگے تو فضّہ (کنیز) دروازہ تک پہنچانے آئی اور دست بستہ عرض کی یا رسول اللہؐ، یہ کنیز بھی آرزو مند ہے کہ حضورؐ کل میری طرف سے دعوت قبول فرمائیں۔ حضرتؐ نے درخواست قبول فرمالی۔ اتفاق سے فضّہ کو سامانِ خوردونوش مہیّا نہ ہوسکے۔ اِدھر شام ہونے کو قریب آئی مگر کسی سے اس سلسلہ میں کوئی ذکر نہ کیا۔ (وہ زمانہ ماہِ رمضان المبارک کا تھا)۔ جب رسولِ خداؐ نمازِ مغرب سے فارغ ہوچکے ، تو جبرائیلِؑ امین نازل ہوئے اور فرمایا، یا حبیبِ خداؐ آج آپ کا افطار فضّہ کے گھر پر ہے۔ رحمتِ ؐدوعالم فوراً روانہ ہوگئے۔ دروازہ پر پہنچ کر دستک دی۔ اور بآوازِ بلند بیٹی کو مخاطب کرکے فرمایا! اے بیٹی تم پر سلام ہو۔ جنابِ سیّدہؑ آواز پہچان کر دروازہ تک آئیں مگر کسی قدر متعجب بھی تھیں کہ آج بابا جان نے کیوں تکلیف فرمائی، کیونکہ افطار کے لیے کچھ نہ تھا۔
الغرض رسولِ خداؐ اندر تشریف لائے ، تھوڑی دیر کے بعد بیٹی سے بولے۔ اے پارۂ جگر فاطمہؑ! آج ہم فضّہ کے مہمان ہیں۔ جنابِ امیرؑ نے فضّہ کو الگ بُلاکر فرمایا، اے فضہّ تو نے رسولِ خداؐ کو کھانے کی دعوت دی، لیکن ہم سے ذکر بھی نہیں کیا۔ فضّہ نے عرض کی، یا امیرالمؤمنینؑ مجھے گھر کے حالات خوب معلوم ہیں اس لیے ذکر نہ کرسکی۔ سوچا تھا کہ میں خود انتظام کروں گی۔ یہ کہہ کر فضّہ نے وضو کیا اور گوشہ میں جاکر دو رکعت نمازِ حاجات ادا کی اور دونوں ہاتھ دعا کے لیے بلند کئے اور گِڑ گڑا کر بولی، اے خالقِ ہربلند و پستی! میں تیرے حبیبؐ کی بیٹی کی کنیز ہوں اور تیرے حبیبؐ کو اپنا مہمان کیا ہے تو جانتا ہے کہ میں کیا ہوں اس لیے تجھے تیری کبریائی کا واسطہ دیتی ہوں کہ میری لاج رکھ لے اور اپنے محبوب اور اُن کی آلِ پاک سے سرخرو کردے۔ ابھی فضّہ دعاکر ہی رہی تھی کہ سارا گھر کھانے کی خوشبو سے مہک اُٹھا۔ پھر فضّہ نے دیکھا کہ پہلو میں خوانِ نعمت (کھانے سے بھرا تھال) رکھا ہے۔ فوراً وہ خوان لے کر فضّہ حاضرِ خدمت بابرکت رسولؐ ہوئی۔ جنابِ ختمی مرتبتؐ نے دریافت فرمایا، فضّہ یہ کھانا کہاں پایا؟ فضّہ نے جواب میں عرض کیا: جس کے بھروسے پر میں نے حضورؐ کو مدعو کیا تھا اُسی نے بھیجا ہے۔ یعنی یہ تعام جنّت سے آیا ہے۔