تعزیہ امام حسینؑ کا معجزہ (چھٹا معجزہ)
ریاست گوالیار میں سرکاری تعزیہ کے اُٹھنے کا اعلان ۹ محرم ہی کو ہوجاتا ہے کہ کل فلاں وقت سرکاری تعزیہ امام بارگاہ سے اُٹھے گا۔ چنانچہ اس کے مطابق ۱۰ محرم کو تعزیہ اُٹھنے کی توپ چلی اور تعزیہ مع بینڈ باجا، پلٹن رسالوں کے ساتھ چلا۔
ایک نہایت ضعیف العمر دکنی پنڈت بھی اپنے گھر سے جلوسِ تعزیہ دیکھنے پیدل چل پڑا۔ ایک تو اُن کی عمر تقریباً نوے (90) سال تھی، دوسرے پیدل چلنا، اپنے مکان سے ایک میل کے فاصلہ پر رانا اولی بازار کے نکّڑ پر جا کر اُن کو جلوس دیکھنا تھا۔ کیونکہ کمزوری میں ہر انسان کے حوصلے پست ہوجاتے ہیں۔ اس لئے دل میں ایک گھبراہٹ سی تھی کہ میں وقت پر پہنچ بھی سکوں گا یا نہیں۔
اُن کے پیچھے اُن کی بیوی بھی پیدل چل رہی تھی۔ بیوی بھی کمزور اور ضعیف تھی۔ پیدل چلنے کی طاقت نہ تھی۔ مگر نہ جانے کون سی طاقت اپنی طرف کھینچے لئے جارہی ۔ میاں کی رفتار بیوی سے کچھ زیادہ تھی، اس لئے بیوی ان سے ڈیڑھ سو قدم پیچھے رہ گئی۔ بڑے زور سے پکارا میاں کو، کہ کیوں مجھے پیچھے چھوڑے جارہے ہو۔ ذرا دیر رُک جاؤ، میں بھی ساتھ ہو لوں۔ میاں نے بے مروّتی سے جواب دیا کہ میں نہیں رُک سکتا، توپ چھُٹ چکی ہے، اگر میں تمہارا انتظار کرونگا تو تعزیہ نکل جائے گا، میری موت کے دن قریب ہیں۔ کیا جانے آئندہ سال تک جیتا رہوں یا نہ رہوں۔ آج اگر تعزیہ نکل گیا تو تمہاری وجہ سے درشن(زیارت) سے محروم رہ جاؤں گا۔یہ کہتا ہوا اور تیز چلنے لگا۔ اور پنڈتانی اسی طرح رینگتی رہی۔ بیچ میں ایک پُل آیا جس کے دونوں طرف لاک کی مُنڈیروں کے بجائے تین تین اِنچ موٹے موٹے لوہے کے پائپ لگے تھے۔ اس پُل کو عبور کرنے کے لئے کونے پر چلی جارہی تھی، کہ کمہاروں کے خچروں کا غول پتھروں سے لدا پھندا نکل پڑا۔ آج راستہ میں بیشمار مخلوق تھی جو بھاگی چلی جارہی تھی۔ اسی بھاگم بھاگ میں نہ جانے کس کا دھکا لگا کہ ایک خچر سے پتھروں سے بھرا ہوا تختہ نیچے گرا جس میں بھاری پتھر تھے ۔ اس کا ایک پتھر پنڈتانی کے پاؤں کے پنجے پر آپڑا اور پاؤں کا کچلا گیا۔ پنڈتانی تڑپ گئی اور چیخ مارکر گر پڑی۔ جو لوگ اِرد گِرد چل رہے تھے، فوراً دوڑ پڑے اور بھاگ دوڑ کر اس کے پٹی باندھی۔ یہ حادثہ دور سے پنڈت جی نے بھی دیکھا مگر چلنے میں کمی نہ کی۔ باون کچہری کے پھاٹک پر جا کر دم لیا۔ اسی اثناء میں ان کے پڑوسی بھی ان کے پاس آ کھڑے ہوئے۔ اور پنڈت جی سے بولے کہ تمہاری بیوی کے پاؤں پر ایک بھاری پتھر گرجانے سے شدید چوٹ آگئی ہے۔ ہم نے تم کو بڑی آوازیں دیں مگر تم نے مڑ کر بھی نہ دیکھا۔ ہم نے پٹی باندھ کر وہیں رحمن غلہ فروش کی دوکان پر بیٹھا دیا ہے۔ یہ تو ہماری محلہ داری اور انسانی فرض تھا۔ لیکن تمہاری اس سنگدلی اور بے مروّتی پر بُرا تعجب ہے۔ پنڈت جی نے جواب میں کہا، آپ لوگوں نے جو ہمدردی کی میں اس کا شکر گزار ہوں ، میری بیوی اپنے پرائیوں سے زیادہ ہے، مگر مجھے اس وقت یہ خوف تھا کہ کہیں ایسا نہ ہو، میں بچھڑ جاؤں اور تعزیہ نہ دیکھ سکوں ، بیوی مرتی ہے تو مرجائے ، کیونکہ بیوی میری عاقبت تھوڑی بنائے گی، عاقبت ہماری آپکی اور کُل جہاں کی حضرت امام حسینؑ اور ان کے نانا رسولؐ اللہ کے ہاتھ ہے۔
پنڈتانی کی یہ حالت تھی کہ پاؤں کے پنجے کی تمام اُنگلیاں چور چور ہوچکی تھیں۔ سخت ترین درد تھا۔ مگر پنڈتانی اس کے باوجود ایک کرایہ کا ٹانگہ روکا۔ ٹانگہ والے نے دریافت کیا کہ کون سے ہسپتال لے چلوں؟ پنڈتانی نے جواب دیا جلدی کرو اور جھنک گنج والے ہنومان کے چوک پر لے چل، کیونکہ راستے بند ہورہے ہیں۔ ٹانگہ والا چوک پر لے آیا اور تعزیہ کے درشن وزیارت کرادیئے۔
تعزیے گزرنے کے بعد پنڈت جی کی نگاہ اتفاق سے پنڈتانی پر پڑگئی۔ دوڑ کر قریب پہنچے اور پنڈتانی سے کیفیت معلوم کرکے بے حد متاثر ہوئے۔بے چینی کا اظہار کیا۔ بیوی بولی، تقدیر میں آج کے دن چوٹ لگنا تھا، لگ گئی، خون بہت نکل گیا۔ مگر کیا ہوا جو خون نکل گیا، میں کیا اور میرا ناچیز خون کیا؟ ان کی حالت پر تو ذرا غور کرو جو کئی کئی دن کے بھوکے پیاسے تھے ، ظالموں نے ان کے بچے بچے کو مہمان بلا کر دغا کیا اور کربلا کی گرم سرزمین پر شہید کردیا۔ لہٰذا حسینؑ کے تعزیے کے درشن ہوگئے تو میں نے سب کچھ پا لیا۔
ریاست گوالیار کے چیف میڈیکل آفیسر ڈاکٹر واگلے صاحب ان پنڈت جی کے قریبی رشتہ دار تھے۔ چنانچہ پنڈت جی اپنی بیوی کو لے کر میموریل میڈیکل ہسپتال پہنچے اور واگلے صاحب نے خود معائنہ کیا اور اپنے ماتحت بیسیوں ڈاکٹروں کی رائے پوچھی، سب نے یہی کہا کہ ان کی ٹانگ کاٹ دی جائے تو ممکن ہے زندگی بچ سکے۔ پنڈتانی نے جب سنا تو وہ قطعی رضامند نہ ہوئیں اور بغیر علاج کے گھر آگئیں اور پنڈت جی سے کہا: فکر مت کرو البتہ کہیں سے تعزیہ کی نیازوں کی اودی یعنی لوبان وغیرہ جو سلگانے کے بعد راکھ ہوجاتی ہے وہ لا دو میں اُسے چاٹ لوں گی۔ امام حسینؑ خود زخم اور ٹوٹی ہوئی ہڈی سب درست کردیں گے۔ دیکھنا تو سہی تم! یہ ڈاکٹر کیا کرینگے۔ بھلا اس بڑھاپے میں ٹانگ کٹوادوں اور لنگڑی بنوں۔ چنانچہ پنڈت جی خاصگی والی گلی میں نورا رنگریز کے گھر میں ایک تعزیہ رکھا جاتا تھا اس کے یہاں سے بہت سی اودی لے آئے۔ پنڈتانی نے بڑے خوش اعتقادی سے اُسے رتی بھر اودی چاٹ لی اور بولی اب نہ وہ درد باقی ہے نہ آگ سی ہے، جلن بھی نہیں۔ (صلوات) غرض یہ کہ بغیر کسی دوا کے تھوڑے دنوں میں اس کی ساری ہڈیاں خودبخود جڑ گئیں اور ساری تکلیف دور ہوگئی۔ (صلوات)۔
کچھ عرصہ بعد ڈاکٹر واگلے کی ایک تقریب میں پنڈتانی سے ملاقات ہوگئی، ڈاکٹر نے پوچھا کہاں علاج کرایا کہ بالکل درست ہوگئیں؟ پنڈتانی نے ساری کیفیت بیان کردی۔ اُس پر ڈاکٹر صاحب بولے، واقعی یہ ڈاکٹری واکٹری سب ہیچ ہے، جھوٹا ڈھکوسلا ہے پر ماتما جو چاہے سو ہوئے۔