جناب سیدہؑ کی کہانی (دوسرا معجزہ) — عربی متن مع اردو ترجمہ | سادات
Skip to content

جناب سیدہؑ کی کہانی (دوسرا معجزہ)

16 مُعْجِزے

جناب سیدہؑ کی کہانی (دوسرا معجزہ)

کسی مُلک کا ایک بادشاہ جو سَیر و شکار کا بہت دلدادہ تھا۔ اُس نے ایک دِن اپنے وزیرِ سلطنت کو سامانِ شِکار تیار ہونے کا حکم دیا۔ چنانچہ وزیر نے سامانِ شکار تیار ہونے کے بعد بادشاہ کو اطلاع دی اور دوسرے روز علیٰ الصبح بمعہ وزیر و میرِ شکار اور دیگر شکاری عملہ کے لوگوں کے ، شکار کھیلنے کی غرض سے شکار گاہ کی طرف روانہ ہوگیا۔ اِس مرتبہ بادشاہ کی لڑکی (شہزادی) یعنی اپنی سہیلی وزیر زادی کے ضد کرکے ہمراہ ہوئی، کافی مسافت طے کرنے کے بعد جب یہ شکاری قافلہ ایک سرسبز و شاداب جنگل میں پہنچا، تو سفر سے آرام کرنے کے لیے بموجب حکمِ شاہی اس جگہ خیمے نصب کئے گئے۔ باورچی خانے کا عملہ کھانا پکانے کے انتظام میں لگ گیا، اور کچھ لوگ سفر کی تھکن کی وجہ سے خیموں کے باہر ہی لیٹ گئے۔ کہ اِتنے میں خلافِ اُمید اس زور و شور کے ساتھ آندھی چلی کہ اس نے بڑے بڑے تناور درختوں کو زمین سے اکھاڑ کر پھینک دیا، گردوغبار کی وجہ سے پاس کی چیز تک دکھائی نہ دیتی تھی، اس طوفانی عالم میں ایک کو دوسرے کی خبر نہ تھی، شاہی خیمہ و خرگاہ کا دور دور تک کہیں پتہ نہ تھا۔ جب آندھی کا زور کچھ کم ہوا اور منتشر شدہ لوگ یکجا ہونا شروع ہوئے تو اس وقت شہزادی اور وزیر زادی کی تلاش تیزی کے ساتھ کی جانے لگی، جن کا کہیں پتہ نہ تھا۔ بادشاہ اور وزیر دونوں محبتِ پدری سے بیتاب ہوکر دونوں لڑکیوں کی تلاش میں بذاتِ خود منہمک تھے، لیکن بہت دَوڑ دھوپ کے بعد بھی کامیابی نہ ہوئی اور بالآخر بادلِ ناخواستہ دارالسلطنت کی طرف واپس لوٹنا پڑا۔ محل سرا میں اِس خبر سے کہرام مچ گیا۔ جس میں رعایا بھی شامل تھی۔

اتفاق سے بادشاہ اور اس کے شکاری عملہ کے واپس جانے کے بعد ہی سرحدی ملک کا دوست بادشاہ اسی مشترکہ جنگل میں شکار کھیلنے کے لئے آیا، شکار کے دَوران اس بادشاہ پر پیاس غالب آئی۔ چنانچہ اس نے اپنے وزیر کو پانی لانے کا حکم دیا۔ مگر پانی کا ذخیرہ جو قافلہ کے ہمراہ تھا ختم ہوچکا تھا، چنانچہ وزیر پانی کی جستجو میں چل کھڑا ہوا اور ایک پہاڑ کی چوٹی پر آبادی کا پتہ لگانے کی واسطے جا پہنچا کہ وہاں اس کو دو (2) حسِین و جمیل لڑکیاں نظر آئیں، یہ لڑکیاں وہی گمشدہ شہزادی اور وزیر زادی تھیں اور اپنے والدین اور قافلہ والوں سے جدا ہوگئی تھیں۔ چنانچہ یہ لڑکیاں جب اپنے والدین سے جدا ہوکر پہاڑ پر پہنچیں تو بہت پریشان ہوئیں، ظاہر ہے کہ اس وقت ان کی کیا حالت ہوئی ہوگی، دونوں لڑکیاں اس اَلم اَنگیز بظاہر دائمی جدائی سے اِس قدر روئیں کہ بیہوش ہوگئیں، عالمِ غش میں دیکھا کہ ایک بی بی نقاب پوش تشریف لائیں اور نہایت شفقت سے فرماتی ہیں کہ اے لڑکیو! تم ہراساں مت ہو۔ نیت کر لو کہ جب ہم اپنے والدین سے مل جائیں گے تو اس وقت ہم جنابِ سیّدہؑ کی کہانی سُنیں گے۔ لہٰذا اِن دونوں لڑکیوں نے حسبِ ہدایتِ معظمہؑ منت مانی۔ جب غش سے ہوش آیا۔ تو اپنے اپنے واقعہِ غشی کو ایک دوسرے سے بیان کرکے منت کی تصدیق کی، اور پھر خدا کے رحم و کرم کی منتظر ہوئیں کہ وزیر مذکور پانی کی تلاش میں یہاں تک آ پہنچا۔ جب اس نے ان دونوں بے یارو مددگار لڑکیوں کو اس طرح پہاڑ کی چوٹی پر دیکھا تو بہت حیران ہوا۔ اس نے پوچھا کہ اے لڑکیو! تم کہاں کی رہنے والی ہو، ذرا اپنے حسب و نسب سے آگاہ کرو اور یہ بتائو کہ تم اس سنسان جگہ اور اتنی اونچی پہاڑ کی چوٹی پر کیسے پہنچیں؟ وزیر کے دریافت کرنے پر دونوں لڑکیوں نے آبدیدہ ہوتے ہوئے اپنا سارا واقعہ بیان کرنے کے بعد اپنے حسب و نسب اور مراتب سے بھی اس کو آگاہ کردیا۔

وزیر ان لڑکیوں کے حالات سے آگاہ ہونے کے بعد فوراً اپنے بادشاہ کے پاس گیا اور اس سے سارا واقعہ بالتفصیل بیان کیا۔ بادشاہ اس واقعہ کو سُن کر بہت متاثر ہوا اور وزیر کو حُکم دیا کہ اگر وہ لڑکیاں اپنی خوشی سے آنا چاہتی ہوں تو اُن کو جاکر فوراً لے آئو۔

بادشاہ کے حکم کی تعمیل میں اس مرتبہ وزیر مذکور معہ چند آدمیوں اور سواری کے ان لڑکیوں کے پاس پہنچا۔ ہمراہیوں کو پہاڑ کے دامن میں چھوڑ کر خود پہاڑ کی چوٹی پر پہنچا اور دریافت کیا کہ اے لڑکیو! تم ہمارے ساتھ چلو گی؟ لڑکیاں راضی ہوگئیں، وزیر نے دونوں کو پہاڑ کے نیچے اُتارا، اور سواری پر سوار کرکے باعزت اپنے بادشاہ کے پاس لے گیا، جو اُن سب کو لے کر اپنے دارالسلطنت میں لے آیا۔

ملازمانِ شاہی کے ذریعے پہلے بادشاہ کو اِطلاع مل گئی کہ اس کی گمشدہ دُختر معہ وَزیر زادی کے اس کے پڑوسی بادشاہ کے ہاں موجود ہے۔ اس نے اپنے وزیر اعظم کو معہ تحائف کے اس بادشاہ کے پاس روانہ کیا اور خط کے ذریعے یہ خواہش ظاہر کی کہ ہماری لڑکیاں جو تم کو ملی ہیں ان کو ہمارے پاس بھیج دو۔

جب یہ خط اس بادشاہ کو ملا تو اُس نے جواباً تحریر کیا کہ آپ کی بچیاں یہاں بخیریت ہیں اور میرے پاس آپ کی امانت ہیں، البتہ میری خواہش ہے کہ آپ شہزادی کی شادی میرے لڑکے سے اور وزیر زادی کی شادی میرے وزیر اعظم کے لڑکے سے کرکے مجھے شکریہ کا موقع دیتے ہوئے اپنے محبت میں اضافہ کریں گے۔ چنانچہ بادشاہ نے یہ بات کچھ غوروفکر کے بعد منظور کر لی۔ لہٰذا دونوں لڑکیاں باعزت واِحترام اپنے والدین کے پاس واپس کردی گئیں۔ اب حسبِ وعدہ تاریخ مقرر ہوئی اور طرفین میں سامان شادی ہونے لگا۔ آخر کار وہ وقت بھی آپہنچا، جب دونوں لڑکیوں کی شادی مذہبی رسوم کے مطابق کردی گئی۔ دُلہنیں رُخصت ہو کر سسرال چلیں، اِتفاقِ وقت کہ اور سامانِ جہیز تو بار کرلیا گیا۔ مگر شادی کو وہ لوٹا جو نہایت قیمتی تھا، وہیں رہ گیا اور اس کا اس وقت کی رسم کے لحاظ سے ساتھ جانا نہایت ضروری تھا۔ راستہ میں شام ہوگئی۔ باراتیوں نے رات ہوجانے کی وجہ سے ایک محفوظ جگہ پر قیام کیا۔ اس وقت حسبِ ضرورت لوٹے کی تلاش ہوئی تو لوٹا نہ مِلا۔ معلوم ہوا کہ وہیں چھوٹ گیا ہے۔ وزیر نے ایک خاص سپاہی کو روانہ کیا کہ لوٹا لے آئے۔

جب سپاہی وہاں پہنچا تو کیا دیکھتا ہے کہ جہاں محل تھا وہاں اب میدان ہے، نہ تخت ہے نہ تاج، نہ بادشاہ نہ فوج، کچھ بھی نہیں، صرف لوٹا میدان میں رکھا ہوا ہے۔ جس کا کوئی نگران بھی نہیں ہے۔ سپاہی نے چاہا کہ لوٹا اُٹھا لے لیکن ممکن نہ ہوسکا۔ اس لئے کہ اس نے جیسے ہی لوٹے کی طرف ہاتھ بڑھایا، معاً ایک خطرناک کالے سانپ نے لوٹے کے اندر سے پھَن نکالا اور اس کو کاٹنے کے لئے لپکا۔ سپاہی اُچھل کی پیچھے ہٹا۔ اس نے بہت کوشش کی کہ لوٹا اُٹھا لے، مگر ممکن نہ ہوا۔ سانپ ہر مرتبہ سَدِّ راہ ہوتا تھا۔ مجبوراً اپنے مُلک کی طرف واپس ہوا اور وزیر کے توسّط سے سارا واقعہ بادشاہ کے گوش گزار کیا۔

بادشاہ کو یہ سن کر حیرت ہوئی اور کچھ دیر تک غوروفکر میں ڈوبا رہا، اور پھر لڑکیوں کے پاس گیا اور بولا کہ معلوم ہوتا ہے کہ تم دونوں جادوگرنیاں ہو۔ یا بدروح ہو جو اِنسانی شکل اِختیار کرکے نئے نئے شعبدے دِکھلا رہی ہو۔ اس وقت تو میں تم دونوں کو قید کرتا ہوں اَلبتہ کل صبح قتل کرادونگا۔ یہ کہہ کر بادشاہ غیظ و غضب میں بھرا ہوا اپنے خیمے میں واپس آیا اور دونوں دُلہنیں خیمہ میں قید کردی گئیں۔

جب دونوں لڑکیوں نے اپنے کو اس حال میں پایا تو وفورِ رَنج سے بیتاب ہوتے ہوئے ایک دوسرے سے گلے مل کر خوب روئیں اور کہنے لگیں کہ معلوم نہیں کیا ماجرا ہے کہ کل شادی ہوئی، دُلہن بنائی گئیں اور آج قید خانے میں قیدی بنے ہیں اور اب کل ہمارا چراغِ حیات گل کردیا جائے گا، خداوندا معلوم نہیں کہ ہم لوگوں سے کون سا ایسا گناہ سرزد ہوا ہے جسکی پاداش میں ہم کو یہ سزا مل رہی ہے، میرے معبود تو معاف کردے۔ یہ کہہ کر اتنا روئیں کہ بے ہوش ہوگئیں۔ عالم غشی میں دیکھا کہ وہی بی بیؑ جو پہاڑ پر نظر آئی تھیں، نظر آئیں، اور بہ کمالِ شفقت فرمایا، لڑکیو! تم نے پہاڑ پر منّت مانی تھی کہ جب ہم اپنے والدین سے ملیں گے تو جنابِ سیّدہؑ کی کہانی سنیں گے۔ تم دونوں اپنے ماں باپ سے ملیں مگر کہانی نہ سُنی، اسی وجہ سے یہ عذاب تم پر نازل ہوا ہے۔ اَب بھی غنیمت ہے، اسی زندان میں کہانی سنو۔ اللہ تعالیٰ جنابِ سیّدہؑ کے طفیل میں تمہاری مشکل کو آسان کردے گا۔ لڑکیوں نے کہا کہ اس قید خانے میں درہم کہاں ہیں جو ہم ’’کہانی‘‘ کے لئے شیرینی منگائیں اور پھر لائے گا کون؟ معظمہؑ نے فرمایا، گھبرائو نہیں، تمہارے دوپٹے کے آنچل میں سے دو درہم تم کو ملیں گے اور خیمہ کی پشت پر سے ایک آدمی جاتا ہوا نظرا آئے گا، بازار قریب ہے، وہ شیرینی لا دے گا، یہ کہہ کر معظمہؑ غائب ہوگئیں۔ لڑکیوں کو ہوش آیا، ایک نے دوسرے سے عالمِ غشی کا واقعہ بیان کیا اور پھر شہزادی نے دیکھا کہ اس کے آنچل سے دو دِرَم بھی بَرآمد ہوئے، دونوں بہت خوش ہوئیں۔ صبح پشتِ خیمہ سے ایک سِن رسیدہ آدمی کو جاتے دیکھ کر اُن کو بلایا اور پھر اپنا مدّعا بیان کیا، چنانچہ انہوں نے دونوں دِرَم کی شیرینی لاکر ان لڑکیوں کو دے دی، پھر دونوں لڑکیوں نے ایک دوسرے سے اسی قید خانے میں ’’کہانی‘‘ سُنی۔ اور پھر دعائیں مانگی۔ اِتنے میں شاہی جلّاد بھی وہاں آن پہنچا۔ اور دونوں لڑکیوں کو قتل گاہ کی طرف لے جانے کے لئے آگے بڑھا کہ دونوں لڑکیوں نے یک زبان ہوکر کہا کہ پہلے ہم کو بادشاہ کے پاس لے چلو کہ ان سے ہم کو کچھ باتیں کرنی ہیں۔

چنانچہ لڑکیاں بادشاہ کے سامنے پیش کی گئیں، انہوں نے بادشاہ سے مودّبانہ عرض کیا کہ اِس مرتبہ آپ پھر اپنے کسی آدمی کو ہمارے یہاں بھیج کر وہاں کے حالات دریافت کرالیجئے۔ اگر اب بھی وہی حالات ہیں تو بیشک ہم کو قتل کرادیجئے۔

بادشاہ نے لڑکیوں کی یہ بات منظور کرلی اور اُسی سپاہی کو جو نہایت سچا تھا، لڑکیوں کے باپ کے یہاں بھیجا کہ جا کر دریافتِ حال کرے، چنانچہ اس نے وہاں جا کر دیکھا کہ محل شاہی اور تخت و تاج سب بدستور موجود ہے، وہ بے حد حیرت زدہ ہوا اور سارا واقعہ آخر اس نے اپنے بادشاہ سے کہہ سنایا، بادشاہ اسی وقت لڑکیوں کے پاس گیا اور پوچھا کہ یہ کیا ماجرا ہے۔ میں بہت زیادہ حیرت میں پڑگیا ہوں۔ چاہتا ہوں کہ تم لوگ میرے اس استعجاب کو دور کرو۔ لہٰذا بادشاہ کا ایماء پاکر لڑکیوں نے اپنی تمام حقیقت پہاڑ پر پہنچنے، اپنے بیہوش ہونے، جنابِ سیّدہؑ کی ’’کہانی‘‘ سننے کی منت ماننے اور اپنے ماں، باپ سے ملنے پر منّت کو فراموش کردینے اور اس کو پورا نہ کرنے کی ساری داستان مفصّل کہہ سُنائی، اور پھر کہا کہ اب جبکہ ہم نے وہ ’’کہانی‘‘ سُن لی تو وہ عتابِ الٰہی جو ہم پر نازل ہوا تھا اب ختم ہوگیا ہے اور ہم مطمئن ہوگئے ہیں۔ چنانچہ بادشاہ نے یقین کرلیا اور اُسی وقت لڑکیوں کو رہا کرکے ان کی عزت و احترام کو اُسی طرح بحال کرتے ہوئے ہنسی خوشی اپنے وطن کی راہ لی۔ یہ ’’کہانی‘‘ سُنارن سے کہہ کر وہ معظمہ رو پوش ہوگئیں۔ سُنارن اپنے گھر واپس آئی۔

جس طرح سُنارن کی مراد خداوندِعالم نے بہ طفیل جنابِ سیّدہؑ پوری کی، اسی طرح رب العالمین، محمدؐ وآلِ محمدؐ کے صدقے میں جملہ سُننے والوں کی دلی مرادیں بر لائے۔ آمین۔

’’کہانی‘‘ ختم ہوگئی۔ اب آپ کو صرف یہ بتانا باقی رہ گیا کہ کہانی ختم ہونے کے بعد اور شیرینی تقسیم ہونے سے پہلے زیارتِ جنابِ سیّدہِؑ عالم کا پڑھنا ضروری ہے۔

کاؤنٹر، آڈیو اور آف لائن مطالعہ ایپ میں دستیاب ہے۔

سادات کو ساتھ رکھیں

مکمل تجربہ — آف لائن مطالعہ، آڈیو، یاد دہانیاں اور بک مارکس — ایپ میں ہے۔

Get it on Google Playجلد آ رہی ہےDownload on the App Store