امام بارگاہ کا معجزہ (پانچواں معجزہ)
افریقہ کے ایک بہت بڑے سیٹھ کی دونوں ٹانگیں گھٹنوں تک آگ میں جل کر ناکارہ ہوگئی تھیں، چربی نکل آئی تھی، اور زخم لاعلاج ہوگئے تھے۔ اصل واقعہ یہ تھا کہ افریقہ میں ایک جادوگر جس کو دچ کا ڈاکٹر کہا جاتا تھا ۔ آگ پر چلا کرتا تھا اور وہ شخص اس کا دامن پکڑ لیتا اس کو آگ نقصان نہیں پہنچاتی تھی۔
ایسے ہی ایک مظاہرے میں سیٹھ موصوف نے بھی اس کا دامن تھام کر آگ میں قدم رکھ دیا۔ چاروں طرف شعلے بلند تھے مگر ان میں ٹھنڈک تھی۔ یہ ٹھنڈک محسوس کرتے ہوئے سیٹھ نے سوچا کہ یہ آگ مصنوعی ہے اور ڈاکٹر کا دامن تھامنا نہ تھامنا برابر ہے۔ چنانچہ اس نے ڈاکٹر کا دامن چھوڑ دیا۔ بس اسی لمحہ اس کے کپڑوں کو آگ لگ گئی۔ اور ٹانگیں فوراً سوختہ ہوگئیں۔ سیٹھ اپنے علاج کے لئے نبردی ہسپتال گیا۔ لیکن کئی ماہ کے علاج کے باوجود کوئی آرام نہ ہوا۔ پھر وہاں سے لندن پہنچا۔ وہاں ڈاکٹروں نے ٹانگیں کاٹنے کا فیصلہ کیا۔ لیکن سیٹھ نے ٹانگیں کٹوانے سے اِنکار کردیا۔ اور واپس اپنے وطن بمبئی آگیا۔ بمبئی میں کچھ لوگوں نے اس کو حسین ٹیکری جاورہ ریاست جانے کا مشہورہ دیا۔
1941ء کا واقعہ ہے کہ سیٹھ کے ملازم اس کو اِسٹریچر پر اُٹھا کر چھوٹے حضرت یعنی حضرت عباسؑ کے روضہ پر لے گئے۔ وہاں روزانہ بائولی نما کنواں جسے جھالر کہتے ہیں۔ روضہ کے احاطہ کے فوراً بعد سیڑھیاں اُترتی تھیں۔ اس کے پانی سے سیٹھ کے پاؤں کے زخم دھوئے جاتے تھے۔ پھر روضہ کا طواف کروا کر اس کے اِسٹریچر کو روضہ حضرت امام حسینؑ پر لے جاتے تھے۔ وہاں عودی کی راکھ اُس کے زخموں پر چھڑکتے تھے۔ پھر صحن میں اس کا اسٹریچر شام تک رکھا رہتا تھا۔ یہی سلسلہ کئی مہینے تک رہا۔ انہیں دنوں دھیرے دھیرے سے اُسکے زخم مُندمل ہونے لگے۔ یہاں تک کہ وہ سیٹھ اس قابل ہوگیا کہ خود اپنے پیروں سے آہستہ آہستہ چل کر جھالر تک پہنچتا اور اپنے زخموں کو دھُوتا اور اپنے پاؤں سے واپس آتا۔ بالآخر ایک دن وہ سیٹھ جو دنیا پھر کے معالجوں سے مایوس ہوکر درِ امام مظلوم حضرت امام حسینؑ پر آگیا تھا ، پوری طرح صحت یاب ہوکر اپنے وطن خوشی خوشی روانہ ہوگیا۔
بے اولاد خواتین خالی چھالنے منت کے طور پر چڑھاتی ہیں اور وہ اولاد کی نعمتوں سے مالا مال ہوجاتی ہیں۔ حسین ٹیکری کی پُرنور عمارتیں کربلائے معلی کے روضوں سے مشتبہ ہیں۔ جھارے کا پانی صاف و ستھرا ہونے کے ساتھ ساتھ بہت شیریں اور شفایاب ہے۔
داؤد حبیب کے خاندان کی ایک بچی لاعلاج ہوچکی تھی وہ اُسے بمبئی سے حُسین ٹیکری لائے اور اسے یہاں کچھ دن رکھا۔ روزانہ جھارے کے پانی سے اس بچی کو غسل کراتے رہے۔ یہاں تک کہ وہ بچی بالکل درست ہوگئی۔ (صلوات)۔
داؤد حبیب نے بچی کی شفایابی پر بڑے پیمانے پر یہیں نیاز دلوائی اور جاورا کے سارے شہریوں کی دعوت کی۔ پھر ایک سرائے تعمیر کرائی اور زائرین کے آرام و سہولت کے سامان مہیا کئے۔ کہا جاتا ہے کہ کوئی زائر جو یہاں ٹھہرتا ہے کوئی معمولی سی چیز نہیں چراتا، اگر کسی نے چرانے کی کوشش بھی کی تو وہ ایسی پریشانیوں میں مبتلا ہوجاتا ہے کہ اس کو واپس کرنا پڑتا ہے۔