حسین ٹیکری معجزہ (چوتھا معجزہ)
1302 ہجری کے آخر کا واقعہ ہے کہ ہندوستان میں سنی مسلمانوں کی ایک ریاست جاورہ کے نام سے تھی۔ لیکن یہاں جو کچھ ہوتا تھا وہ شیعہ ریاست میں بھی نہیں تھا۔ گھر گھر بارہ اِماموںؑ کی کونڈوں پر نیاز دلوائی جاتی۔ اگر ایام عشرہ (ماہِ محرم الحرام) میں کسی گھر سے دُھواں نکلتا تو لوگ اس گھر والوں کو بُرا بھلا کہتے۔ نویں اور دسویں محرم کو نواب صاحب کی طرف سے شہر میں، گھر گھر کھچڑا تقسیم کیا جاتا۔ عاشورہِ محرم کو سرکاری امام باڑہ سے نواب صاحب کا ایک ابَرق کا بنا ہوا تعزیہ نکالا جاتا۔ کہتے ہیں اُس وقت اس تعزیہ پر پچاس ہزار روپے سے اوپر خرچ آتا تھا۔ پھر تمام شہر کے تعزیے کو توالی کے نیچے جمع ہوتے تھے۔ ان میں ایک تعزیہ ’’بتاشوں‘‘ کا اور ایک میواتیوں کا تعزیہ تھا،
کوتوالی کے نیچے سارے تعزیے اکٹھے ہوتے اور چھوٹی بائولی کے تعزیے کے انتظار میں سب لوگ کھڑے رہتے۔ یہ تعزیہ بڑے طمطراق سے آتا اور ہمیشہ آڑا ترچھا رہتا۔
جب چھوٹی بائولی کا تعزیہ آتا تو اس کے پیچھے سرکاری تعزیہ ہوتا اور سرکاری تعزیہ کے پیچھے سارے شہر کے تعزیے ہوتے۔ چھوٹی بائولی کا تعزیہ نواب صاحب کے چچا داد مقیم خاں مرحوم کا تعزیہ تھا۔ چونکہ داد مقیم خان ، نواب صاحب کے چچا تھا اور اپنے تعزیہ ہی کی طرح آرے، ترچھے اور اکڑ دھکڑ کے آدمی تھے۔ لہٰذا ان کے تعزیے کو سبقت دی جاتی تھی۔ اس کی ایک وجہ اور بھی تھی، ایک مرتبہ نواب اِفتخار علی خان کے والد نواب اسمٰعیل خان زندہ تھے۔ ایک سال ہندؤں کا تہوار ’’جنم اشٹمی‘‘ اور مسلمانوں کے محرم کا روزِ عاشورہ ایک ہی دن پڑا۔ایک طرف سے داد مقیم خان کا تعزیہ یعنی چھوٹی بائولی کا تعزیہ آگے بڑھا اوردوسری طرف ہندؤں کی مورتی۔ اَب ہندؤں اور مسلمانوں میں ٹھن گئی۔ ہندو چاہتے تھے کہ پہلے ہمارا جلوس گزرے اور مسلمان چاہتے تھے کہ پہلے ہمارا جلوس گزرے۔ جب نواب اسمٰعیل خاں کو معلوم ہوا تو وہ گھوڑے پر سوار ہوکر جائے واردات پرپہنچے تو انہوں نے ہندؤں سے کہا کہ تم ’’مورتی آگے بڑھائو‘‘ اور مسلمانوں کے تعزیے آگے بڑھنے سے روک دیا۔ جب داد مقیم خان کو یہ خبر ملی تو انہوں نے مسلمانوں سے کہا کہ فوراً ٹھنڈے کردو، اِس کا عذاب نواب صاحب کے سر ہوگا۔
چنانچہ کہتے ہیں اس رات نواب صاحب ایک لمحہ کے لئے بھی نہ سو سکے۔ وہ جب پلنگ پر لیٹتے، پلنگ اُلٹ جاتا اور ماتم کی آواز دور سے اِن کے کانوں میں آتی تھی۔ نواب صاحب نے رات بڑی مصیبتوں سے کاٹی ۔صبح ہوتے ہی کچھ لوگ جو مضافات میں رہتے تھے۔ نواب صاحب کے پاس آئے اور بتایا ،گذشتہ رات دو تین میل کے فاصلہ سے دیکھا کہ ایک جلوس ماتم کرتا ہوا گزررہا ہے، اور جلوس میں مشعلیں بیشمار جل رہی ہیں اور ساتھ ہی کچھ گھوڑسوار بھی ہیں۔
جب ہم لوگ عَلَی الصّباح اس مقام پر پہنچے تو گھوڑوں کے سُموں کے تازہ نشانات دیکھے۔ کچھ جلتی ہوئی لکڑیاں دیکھیں، اور ایک نیا چشمہ پانی کا اُبلتا دیکھا( صلوٰۃ)۔
چنانچہ یہ تمام واقعہ سن کر نواب صاحب اُس وقت ان آدمیوں کے ساتھ اس جگہ پہنچے اور وہ تمام چیزیں بچشم خود دیکھیں اور بہت زیادہ متاثر ہوئے۔ پھر حکم دیا کہ فوراً اس جگہ کا احاطہ کھینچ دو۔ کچھ دنوں کے بعد اس جگہ ایک بہت شاندار عمارت تعمیر کرائی جس کا نام جھالس اور اس جگہ کا نام حسین ٹیکری رکھا۔ نواب صاحب نے داد مقیم خان سے معافی مانگی اور تعزیے دوبارہ اُٹھوائے۔ اس کے بعد پھر نواب صاحب اور اُن کے ولی عہد کو اہلبیتؑ اطہار سے بڑی عقیدت ہوگئی۔ یہاں تک کہ نواب صاحب کا مزار بھی حسین ٹیکری میں بنایا گیا۔
حسین ٹیکری کے بارے میں بہت سی باتیں مشہور ہیں۔ کہاجاتا ہے کہ آسمان سے حسین ٹیکری کے مزارات پر روشنی اُترتی ہے اور ان مزارات کا طواف کرتی ہوئی گزر جاتی ہے۔ بہت سے لوگوں نے شہدائے کربلا کی زیارات بھی کی ہیں۔ اس کے علاوہ یہاں بہت مرادیں مانگی جاتی ہے وہ ضرور پوری ہوتی ہے۔
حُسین ٹیکری پر شبِ جمعہ کو زیارات کے لئے لوگ جمع ہواکرتے ہیں اور عموماً شبِ جمعہ ہی کو زیارات ہوتی ہیں۔ چھوٹے سرکارؑ کے روضہ پر بعد مغرب کسی کو جانے کی اجازت نہیں ہے۔ چھوٹے سرکار سے بڑے سرکار کا روضہ ڈیڑھ فرلانگ کے فاصلہ پر ہے۔ نواب حسین صاحب انجینئر مرحوم ایک شبِ جمعہ کو زیارت کو گئے۔ عشاء کے بعدچھوٹے سرکار کے روضہ کی جانب جنگل میں درختوں سے کچھ روشنی نمودار ہوئی۔ اس کو دیکھتے ہی زائرین نے درود پڑھنا شروع کردیا۔ کچھ لوگ بلند آواز سے نوحہ پڑھنے لگے۔ اور ماتم کرنے لگے۔ عجیب روح پرورکیفیت تھی جو ماحول پر طاری تھی۔ نواب حسین مرحوم کہنے لگے کہ جنگل کی دوسری طرف جو گاؤں ہے اس کے لوگ کچھ جَلا رہے ہیں ، جس کی وجہ سے روشنی ہوگئی۔ ان کا یہ کہنا تھا کہ روشنی تیز اور بلند ہونی شروع ہوگئی۔ (صَلَواۃ)۔
بس تاریکی میں روشنی کا ایک بادل تھا جو دور درختوں پر بلند ہورہا تھا۔ خاصی بلندی پر پہنچ کر اِس پُر نور بادل کے دو ٹکڑے ہوگئے، پھر مزید ایک ٹکڑے کے دوٹکڑے ہوئے۔اس کے بعد پھر تینوں نور پارے فضا میں بلند ہوگئے۔ پھر بڑے نور پارے سے دو چھوٹے نور پارے الگ ہوکر جگمگانے لگے۔ اور پانچ نور آدھے یا پونے گھنٹہ تک چھوٹے سرکار کے روضہ پر فضا میں معلق رہے، پھر اچانک غائب ہوگئے۔