باب الحوائج حضرت امام موسیٰ کاظمؑ (سولہواں معجزہ) — عربی متن مع اردو ترجمہ | سادات
Skip to content

باب الحوائج حضرت امام موسیٰ کاظمؑ (سولہواں معجزہ)

16 مُعْجِزے

باب الحوائج حضرت امام موسیٰ کاظمؑ (سولہواں معجزہ)

جناب امام موسیٰ کاظم علیہ السلام کے زمانہ میں ایک ضعیف مومنہ ایک جھونپڑی میں رہتی تھی۔ اس کا ایک فرزند تھا۔ وہ جنگل روزانہ جاتا اور لکڑیاں چُن کر لاتا۔ ان کو فروخت کرتا اور دونوں ماں بیٹے انہی چند پیسوں میں گزارہ کرتے اور خدا کا شکر ادا کرتے۔ اسی طرح اس لڑکے کی عمر 15 یا 16 سال کی ہوگئی۔ اتفاق سے ایک دن یہ لڑکا بادشاہِ وقت کے محل کی طرف سے گزر رہا تھا کہ بادشاہ کی لڑکی پر اسکی نظر پڑ گئی جو نہایت ہی خوبصورت تھی۔ اس نے فوراً اپنی نگاہیں نیچی کرلیں۔ مگر دل میں کہنے لگا، میں ایک غریب مزدور ہوں، بھلا اس لڑکی سے میری شادی کس طرح ہوسکتی ہے۔ بادشاہ ہرگز اس کی شادی میرے ساتھ کرنا پسند نہ کرے گا۔ یہی سوچتا ہوا گھر آیا اور گھر آتے ہی چارپائی پر لیٹ گیا۔ نہ کھانا کھایا، نہ اپنی والدہ سے بات کی۔والدہ کو اپنے بیٹے سعید حیدر کی طرف سے فکر دامن گیر ہوئی اور کہنے لگی کہ بیٹا آج خلافِ عادت تم کیوں خاموش ہو، نہ کھانا کھایا اور نہ بات کی۔ کیا کچھ طبیعت ناساز ہے یا کوئی رنج ہے۔ بہت اصرار کے بعد سعید حیدر نے کہا کہ آج میں بادشاہ کے محل کے پاس سے گزررہا تھا کہ بادشاہ کے محل کے بالاخانے پر بادشاہ کی لڑکی کھڑی تھی جو نہایت خوبصورت ہے، اگر میں اس سے شادی کرنا چاہوں تو بادشاہ ہرگز میرے ساتھ اس کی شادی نہ کرے گا۔ یہ بات سُن کر اس کی والدہ نے تسلّی دی اور کہا کہ گھبرائو نہیں۔ کھانا کھائو اور پھر چلو امام موسیٰ کاظم علیہ السلام ہمارے ساتویں امام ہیں۔ ان کو تمام ذکر سنائیں گے اگر قسمت میں ہے تو ان کی مدد سے آسان ہوجائے گا۔ نا اُمید نہ ہونا چاہیے۔ خدا مالک ہے۔ وہ چاہے تو ادنیٰ کا اعلیٰ کردے وہ ذرّہ نواز ہے۔

یہ سُن کر لڑکے نے کھانا کھایا۔ اور دونوں والدہ اور بیٹا حضرت امام موسیٰ کاظم علیہ السلام کی خدمت میں حاضر ہوئے اور قدم بوسی کے بعد اپنا مقصد بیان کیا۔ انہوں نے سُن کر اُمید دلائی اور کہا خدا سب کا کارساز ہے اس کے لیے غریب اور امیر یکساں ہیں۔ تم جنگل سے چند اینٹیں لائو۔ کچھ بڑی اور کچھ آدھی اور چوتھائی اور کچھ کنکریاں۔ جب ماں بیٹے نے اینٹیں وغیرہ لادیں تو ان پر امام موسیٰ کاظم علیہ السلام نے ایک کپڑا ڈال دیا۔ اور دو رکعت نماز پڑھی اور دعا کی۔ ان کی دعا کی برکت سے فوراً اینٹیں سونے چاندی کی بن گئیں اور کنکریاں، یاقوت، زمّرد، پکھراج، نیلم، غرض بیش بہا جواہرات بن گئے۔ پھر لڑکے سے کہا تم بادشاہ کے پاس جاکر اپنا مدّعا بیان کرو۔

چنانچہ یہ لڑکا سعید حیدر بحکمِ امامؑ، بادشاہ کے پاس گیا۔ اس کے داہنے بائیں دو وزیر بیٹھے تھے۔ بادشاہ نے دیکھ کر کہا کہ یہ کون آرہا ہے۔ اس کو نکالو۔ دائیں جانب کے وزیر نے کہا آنے دو کوئی ہرج نہیں۔ معلوم ہونا چاہیے کہ کس مقصد سے آرہا ہے، بائیں جانب والے وزیر نے بادشاہ کے کہنے کے مطابق اس کو روکا۔ لیکن دوسرے وزیر کے سمجھانے پر اس کو بادشاہ کی ملاقات کی اجازت مل گئی۔ تو وزیر نے پوچھا ، کیا کہنا چاہتے ہو، بیان کرو۔ تب اس نے اپنا مقصد بیان کیا۔

یہ سن کر بادشاہ بگڑ گیا اور کہا کہ اس کو نکالو یہاں سے، یہ اِس پھٹے حال سے میری لڑکی سے شادی کی خواہش رکھتا ہے، نکالو جلدی۔ مگر دائیں جانب والے وزیر نے بادشاہ کو پھر سمجھایا اور کہا کہ بادشاہ سلامت ناراض نہ ہوں۔ جہاں لڑکی ہوتی ہے وہاں اچھے بُرے پیغام آتے ہی ہیں۔ آپ اس کو دھکے دے کر نہ نکالیں، بلکہ کچھ شرائط لگائے دیتے ہیں۔ نہ اس سے شرائط پوری ہوں گی نہ دوبارہ آئے گا۔

بادشاہ یہ سُن کر خاموش ہوگیا۔ وزیر نے کہا۔ میاں لڑکے سونے چاندی کی جتنی بھی اینٹیں لاسکتے ہو لے آئو۔ اور جواہرات بھی لائو۔ اگر تم نے یہ چیزیں حاضر کردیں تو تم کو اپنی فرزندی میں لینا منظور کرلیا جائے گا۔ یہ سُن کر سعید حیدر اپنے گھر آیا اور والدہ کو لے کر حضرت امام موسیٰ کاظم علیہ السلام کی خدمت میں حاضر ہوا اور تمام و کمال جو کچھ بھی اس کے ساتھ بادشاہ کے یہاں گزرا تھا بیان کردیا۔ حضرتؑ نے فرمایا، اچھا۔ یہ کل رقم، سونے چاندی کی اینٹیں اور تمام جواہرات لے کر بادشاہ کے پاس جائو۔

جب دوسرا دن ہوا تو تمام اینٹیں اور جواہرات لے کر بادشاہ کے دربار میں گیا اور بادشاہ کے سامنے رکھ دیا۔ وزیروں نے خوان پوش اُٹھا کر دیکھا تو اُن سونے چاندی کی اینٹوں اور جواہرات سے تمام دربار جگمگا اُٹھا۔ یہ دیکھ کر بادشاہ دنگ رہ گیا اور دل میں سوچنے لگا کہ یہ چیزیں تو میرے خزانہ میں بھی نہیں ہیں۔ اس قدر بوسیدہ لباس والا لڑکا اور ایسے بیش بہا جواہرات اور سونا چاندی کہاں سے لے کر آیا ہے۔ لیکن پھر بھی اپنی دانست میں بادشاہ نے نہایت غوروفکر کے بعد حکم دیا کہ یہ سب کچھ خزانے میں پہنچادو۔ اور لڑکے کو دربار سے نکال دو۔ پھر وزیر نے اس کو سمجھایا اور کہا آپ ایسا نہ کریں۔ جب اتنا مال و جواہرات ہماری شرط کے مطابق لے آیا تو اس کے گھر بھی کچھ نہ کچھ تو ضرور ہوگا۔ ایسا لڑکا آپ کو نہ ملے گا۔ خدا کے نام پر منظور کرلیں۔

چنانچہ وزیر کے سمجھانے سے بادشاہ کی سمجھ میں آگیا اور اس نے شادی کا اقرار کرلیا۔ سعید حیدر دربار سے خوش خوش رخصت ہوا اور حضرت امام موسیٰ کاظم علیہ السلام کے حضور میں حاضر ہوکر بہ تمام و کمال ماجرہ بیان کیا۔ آپؑ نے فرمایا کہ جائو اب تمہارے ساتھ شادی ہوجائے گی۔ اب جاکر دن تاریخ مقّرر کرو۔ اور شادی کر لو۔ بالآخر نتیجہ یہ ہوا کہ بادشاہ نے اپنی خوبصورت لڑکی کی شادی سعید حیدر کے ساتھ کردی۔ جہیز میں بہت کچھ زر و زیورات اور سازو سامان اپنی بیٹی کودیا۔ لیکن سعید حیدر نے اپنی دلہن کو اسی جھونپڑی میں لاکر اُتار دیا۔ لڑکی جھونپڑی کو دیکھ بہت حیران و پریشان اور رنجیدہ ہوئی۔ اس نے دیکھا کہ سوائے میرے سامان کے اس جھونپڑی میں کچھ بھی نہیں ہے۔ یہ کیا ماجرا ہے۔ کچھ دیر سوچتی رہی۔ پھر لڑکے سے کہنے لگی۔ کہ یہ کیا بات ہے کہ تم نے مجھے اس جھونپڑی میں لا کر اُتارا اور آپ کے گھر میں تو کچھ بھی نہیں ہے۔ کل جب میرے عزیز و اقارب مجھے لینے کیلئے آئیں گے تو وہ کیا کہیں گے۔ لڑکے نے جواب دیا پریشان نہ ہوں۔ انشاء اللہ صبح کو سب کچھ ہوجائے گا۔ مصلحتِ وقت کی وجہ سے یہاں اُتارا ہے۔ خیر وہ خاموش ہوگئی۔ جب صبح ہوئی تو یہ لڑکا حضرت امامؑ کی خدمت میں حاضر ہوا اور جو کچھ لڑکی نے کہا تھا اور جو کچھ اُس کو بادشاہ نے جہیز میں دیا تھا تمام حال سے آگاہ کیا۔ حضرتؑ نے فرمایا، کہ گھبرانے کی ضرورت نہیں ہے، ابھی تھوڑی ہی دیر میں سب کچھ ہوا جاتا ہے۔

چنانچہ امامؑ نے زعفر جن کی اولاد میں سے ایک جن کو بلایا اور فرمایا کہ ساز و سامان سے سجا ہوا ایک محل فوراً لاؤ اور وہاں پہنچا دو۔ جِن نے حکمِ امامؑ کی تعمیل کی، اور ایسا لا کر حاضر کیا کہ جس میں عجیب و غریب سامانِ آرائش موجود کہ کبھی کسی نے نہ دیکھا تھا۔ چنانچہ سعید حیدر جب اپنی دلہن کو اس محل میں لے گیا تو وہ بہت خوش ہوئی۔ جب دلہن کے عزیز اس کو لینے آئے تو محل کو دیکھ کر حیران و ششدر رہ گئے۔

بہر حال جب عزیز اس کو لے کر واپس گئے تو بادشاہ کو بتایا کہ ایسا عمدہ محل ہے وہ بہت خوش ہوا۔ اب یہ لڑکی آنے جانے لگی۔ خوش و خرّم رہتی رہی۔ ایک دن لڑکے سے کہنے لگی۔ یہ بتائو کہ آپ پھٹے حال سے کیوں رہتے تھے اور پہلے مجھے جھونپڑی میں کیوں اُتارا اور خود اس جھونپڑی میں کیوں رہتے تھے۔ تب اُس نے تمام گزشتہ ذکر سنایا اور کہا اس طرح میں تم کو دیکھ کر غمزدہ ہوا اور میری والدہ حضرت امام موسیٰ کاظم علیہ السلام کی خدمت میں گئیں اور جو کچھ تمہارے گھر سونا چاندی، جواہرات وغیرہ لے گئے تھے اور جو کچھ اب تمہارے سامنے موجود ہے وہ سب امام علیہ السلام کا عطا کردہ ہے ورنہ میں تو ایک بہت ہی غریب آدمی ہوں۔

پھر اُس لڑکی نے کہا کہ اُن امامؑ کی خدمت میں مجھے بھی لے چلو۔ چنانچہ سعید حیدر اپنی دلہن کو امامؑ کی خدمت میں لے گیا۔ جب اس نے امامؑ کو دیکھا تو اُن کے قدموں پر گر گئی اور اس قدر معتقد ہوگئی کہ جان نثار کرنے لگی۔ یہ معجزہ سُن کر اُس کے عزیز و اقارب بھی ایمان لے آئے۔

جس مومن کو کوئی مشکل درپیش ہو وہ یہ کہانی گیارہ دن پڑھے۔ انشاء اللہ بہ طفیلِ امام موسیٰ کاظمؑ بہت جلد مراد پوری ہوتی ہے۔ اعتقاد شرط ہے ، بعد میں جب مراد مل جائے تو امام علیہ السلام کی نیاز نہایت پاکیزہ طریقہ سے کھیر پکاکر دلائیں۔

کاؤنٹر، آڈیو اور آف لائن مطالعہ ایپ میں دستیاب ہے۔

سادات کو ساتھ رکھیں

مکمل تجربہ — آف لائن مطالعہ، آڈیو، یاد دہانیاں اور بک مارکس — ایپ میں ہے۔

Get it on Google Playجلد آ رہی ہےDownload on the App Store