معجزہ حضرت امام موسیٰ کاظمؑ (آٹھواں معجزہ) — عربی متن مع اردو ترجمہ | سادات
Skip to content

معجزہ حضرت امام موسیٰ کاظمؑ (آٹھواں معجزہ)

16 مُعْجِزے

معجزہ حضرت امام موسیٰ کاظمؑ (آٹھواں معجزہ)

شہر طالقان میں ایک ماہی گیر (مچھلی پکڑنے والا) علی بن صائح طالقانی رہتا تھا۔ وہ روز صبح کو کشتی لے کر سمندر میں مچھلیوں کے شکار کے لئے نکل جاتا اور دوپہر تک جتنی مچھلیاں ہاتھ آتیں ان کو بیچ کر اپنی بیوی اور بچوں کا پیٹ پالتا۔

ایک رات جب وہ بستر پر لیٹا، تو ایسا سویا کہ وقت پر آنکھ نہ کھل سکی۔ بیوی کے بار بار جگانے پر بالآخر جاگ اُٹھا۔ آنکھوں میں نیند کا خمار باقی تھا۔ مگر کشتی لے کر روانہ ہوگیا۔ نیند کے سبب کشتی کے چَپّو اس کے ہاتھوں میں سنبھل نہیں رہے تھے۔ اِسی اونگھ میں کشتی کے چَپّو ہاتھ سے چھوٹ گئے۔ وہ بیٹھے بیٹھے سو گیا۔ کشتی ہوا کے رُخ پر بہتی بہتی ایسی جگہ پہنچ گئی جہاں سمندر میں بھنّور تھا۔ کشتی بھَنّور میں پھنس کر چکر کھانے لگی۔ اُس کے جھٹکوں سے آنکھ کھل گئی، کشتی بھنّور میں دیکھ کر وہ بہت گھبرایا۔ مگر فوراً چپّوؤں (پیڈل) کی مدد سے کشتی کو گرداب (گول چکر) سے نکالنے کی کوشش کرنے لگا۔ لیکن کشتی اس قدر تیزی سے گھوم رہی تھی کہ جیسے بہت جلد ڈوبنے والی ہے۔اسی جدوجہد میں چپّو بھی اس کے ہاتھوں سے نکل کر سمندر میں جا گرے اور دیکھتے دیکھتے بھنّور کے زور سے کشتی کے دو ٹکڑے ہوگئے اور صالح طالقانی بھی سمندر میں گِر گیا۔ اور ہاتھ پاؤں مارنے لگا۔ اِسی اثناء کشتی کا ایک تختہ بہتا ہوا اُس کے ہاتھ آگیا اور وہ اس کے اوپر بیٹھ گیا۔

تختہ موجوں کے رحم وکرم پر بہتا ہوا چلا جارہا تھا۔ دور دور تک خشکی کے آثار نہ تھے۔ تین دن اور تین رات اُسی تختے پہ رہا۔ طالقانی بھوک و پیاس سے لبِ دم (مرنے کے قریب) تھا۔ اسی عالم میں سوچنے لگا کہ شاید میرا وقتِ آخر ہے۔ چنانچہ اس نیم بیہوشی اور تھکن کے عالم میں خلوصِ دل سے کہنے لگا:

اے امام موسیٰ کاظمؑ! آپؑ تو باب الحوائج ہیں آپؑ تو بگڑی بنانے والے ہیں اور حاجتمندوں کی حاجت پوری کرتے ہیں، میری بھی مدد کیجئے۔

فریاد کو پہنچو! دمِ امداد ہے آؤ یا موسیٰ کاظمؑ

حسنینؑ کا صدقہ میری بگڑی کو بناؤ یا موسیٰ کاظمؑ

تکلیف مسافر کو کبھی ہو نہ سفر میں، اِیذا نہ ہو حضر میں

گھر خیر سے پہنچاؤ، عزیزوں سے ملاؤ یا موسیٰ کاظمؑ

کبھی سوچتا کہ سمندر میں خود کو گرا دوں تاکہ اِس زندگیِ ناتمام کاخاتمہ ہوجائے۔ غرض یہ کہ طالقانی نقاہت (کمزوری) کے باعث بے ہوش ہوگیا۔ تھوڑی دیر بعد اچانک اس کے تختہ کو زبردست جھٹکا لگا اور تختہ خشکی کے حصہ سے جالگا۔ (صلوات)۔

طالقانی کی آنکھ جب جھٹکے کی وجہ سے کھلی تو خود کو خشکی پر پایا، اِدھر اُدھر نظر دوڑائی تو دیکھا کہ ہر طرف طرح طرح کے پھلوں کے درخت جن کی شاخیں بہت نیچی جھُکی ہوئی ہیں، بیشمار ہیں۔ اور چاروں طرف نہریں رَواں دَواں۔ اس نے کچھ دیر سُستا کر ایک درخت کے پاس پہنچ کر خوب پھل کھائے اور پانی پیا، تھوڑی دیر آرام کیا۔ پھر وضو کرکے دو رکعت نماز شُکر انہ ادا کی۔ اور ایک پیڑ کے نیچے سو گیا۔ اسی دوران ایک خوفناک آواز کان میں پہنچی، جس سے آنکھ کھل گئی۔ دیکھا دو گھوڑے آپس می لڑ رہے ہیں، جیسے ہی گھوڑوں نے دیکھا فوراً سمندر میں کود پڑے۔ پھر ایک عظیم الخلقت پرندہ جو کہ ہاتھی سے بھی کئی گناہ بڑا تھا۔ آکر قریب کی پہاڑی پر بیٹھ گیا۔ طالقانی درختوں کے درمیان سے گزر کر اُس پہاڑی کے پاس پہنچا۔ وہ پرندہ اسے دیکھ کر ایک طرف کو اُڑا۔ یہ اس کے پیچھے چلا کہ وہ کدھر جاتا ہے، تھوڑی دور جانے کے بعد ایک غار سے تلاوتِ قرآن مجید تسبیح و تہلیل اور تکبیر کی آواز سنائی دی۔ میں اس آواز کی طرف ہو لیا۔ جب قریب پہنچا تو غار سے پھر آواز آئی، اے علی بن صالح طالقانی خدا تم پر رحم کرے۔ غار کے اندر آ جاؤ۔ (صلوات)

جب طالقانی غار کے اندر گیا، دیکھا ایک نورانی چہرہ کھدر پوش تشریف فرما ہیں۔ اُنہیں جھک کر سلام کیا۔ اُدھر سے سلام کا جواب ملا۔ ساتھ ہی یہ بھی فرمایا، اے علی بن صالح! تم بھوک، پیاس اور خوف کے امتحان میں کامیاب ہوئے۔ اللہ تعالیٰ نے تم پر رحم کیا، تمہیں نجات دی اور پاکیزہ پانی پلایا۔ میں اُس وقت سے واقف ہوں، جب تم کشتی پر سوار تھے۔ اور سمندر میں تمہاری کشتی ٹوٹ گئی تھی۔ کافی دور تک موجوں کے تھپیڑے کھاتی رہی۔ تم نے اپنے آپ کو سمندر میں گِرانے کا اِرادہ کیا تھا، اگر ایسا کردیتے تو ہلاک ہوگئے ہوتے۔ تم نے بڑی مصیبت اُٹھائی۔ میں اس وقت کو بھی جانتا ہوں، جب تم نے نجات پائی اور دو اہم چیزیں دیکھیں۔

طالقانی نے جب اس بزرگ شخصیت کی باتیں سُنیں تو پھر اس طرح مخاطب ہوا۔ میں آپ کو اللہ و رسولؐ اور ائمہؑ طاہرین علیہم السلام کا واسطہ دے کر پوچھتا ہوں کہ آپ کون ہیں؟ اور آپ کا اسمِ گرامی کیا ہے؟ نیز میرے حالات آپکو کس طرح معلوم ہوئے؟ آپ نے فرمایا، اے علیؑ بن صالح! میں زمین پر اللہ کی حجت ہوں اور میرا نام موسیٰ بن جعفرؑ ہے۔ (صلوات)۔

پھر آپؑ نے فرمایا کہ تم بھوکے ہو؟ میں نے عرض کیا، جی ہاں۔ یہ سُن کر آپؑ نے اپنے لبوں کو حرکت دی اور ایک خوانِ نعمت رومال سے ڈھکا ہوا حاضر ہوگیا ۔ حضرتؑ نے خوان سے رومال ہٹایا اور فرمایا ’’اللہ نے جو رزق دیا ہے اُسے کھالو‘‘۔ میں نے بیٹھ کر خوب سیر ہوکر کھایا، ایسا کھانا کبھی نہ کھایا تھا، پھر مجھے پانی پلایا جو ایسا خوش ذائقہ پانی تھا ، اس سے قبل نہ پیا تھا۔

پھر آپؑ نے دو رَکعت نماز پڑھی اور مجھ سے فرمایا، اے علیؑ بن صالح تم گھر جانا چاہتے ہو؟ میں نے کہا، جی حضور! آپؑ نے دعا کے لئے ہاتھ بلند کئے، ناگاہ بادَل کے ٹکڑے آنے لگے اور غار کو چاروں طرف سے گھیر لیا، اور بحکمِ خدا آپؑ کو سلام کیا۔ حضرتؑ نے جوابِ سلام دے کر دریافت فرمایا۔ کہاں کا ارادہ ہے۔ انہوں نے سرزمین کا نام لیا اور چلے گئے۔ تھوڑی دیر کے بعد ایک دوسرا ٹکڑا بادَل کا آیا اور سلام کیا۔ آپ نے بعد جوابِ سلام پوچھا، کدھر جارہے ہو؟ بادَل نے جواب دیا، طالقان! فرمایا، اے خدائے وحدہ لاشریک کا اِطاعت گذار اَبْر! جس طرح اللہ تعالیٰ کی وَدیعت کردہ اشیاء اُٹھا کر لے جارہا ہے، اُسی طرح اِس (علی بن صالح) کو بھی لے جا۔ جواب مِلا۔ بَسر و چشم۔ پھر حضرتؑ نے اَبْر کو حُکم دیا کہ زمین پر برابر ہوجا، وہ زمین پر آگیا۔ آپؑ نے علی بن صالح کو بازو پکڑ کر اُس پر بیٹھا کر حکم دیا کہ انہیں اِن کی منزل تک پہنچادو۔ چنانچہ بادَل اُٹھا اور ہوا کے دوش پر چل پڑا۔ (صلوات)۔

بخدا مجھے کوئی تکلیف یا خوف مطلق نہیں ہوا اور شہر طالقان جا پہنچا۔

اے اللہ! جس طرح علی بن صالح طالقانی کی دِلی مُراد بہ طفیل امام موسیٰ کاظم علیہ السلام بَرآئی اُسی طرح ہر مومن اور مومنہ کی حاجت پوری کر۔

کاؤنٹر، آڈیو اور آف لائن مطالعہ ایپ میں دستیاب ہے۔

سادات کو ساتھ رکھیں

مکمل تجربہ — آف لائن مطالعہ، آڈیو، یاد دہانیاں اور بک مارکس — ایپ میں ہے۔

Get it on Google Playجلد آ رہی ہےDownload on the App Store