معجزہ حضرت امام جعفر صادقؑ (ساتواں معجزہ)
کسی شہر میں ایک لکڑہارا نہایت مفلس اور نادار رہتا تھا۔ وہ مصیبت زدہ ہر روز جنگل سے لکڑیاں کاٹ کر لاتا اور فروخت کرکے بمشکل اپنا اور اپنے بچوں کا پیٹ پالتا تھا۔ افلاس سے تنگ آکر ایک دن اس نے اپنی بیوی سے کہا کہ برائے روزگار باہر جاتا ہوں۔ عجب نہیں کہ پروردگارِ عالم رحم فرمائے اور ہماری مصیبت دور ہو۔ یہ کہہ کر لکڑہارا تلاشِ معاش میں گھر سے نکل کھڑا ہوا اور ایک دوسرے شہر جاپہنچا۔ مگر وہاں بھی تقدیر نے ساتھ نہ دیا۔ اور وہاں بھی یہی کام کرنے پر مجبور ہوگیا۔ اور یہ سلسلہ بارہ 12 برس تک رہا۔ لیکن فکر و پریشانی میں مفلسی نے ساتھ نہ چھوڑا۔ اس لئے نہ تو اس نے اپنے بال بچوں کو کچھ بھیج سکا ، نہ انکی خبر لی۔
لکڑہارے کی بیوی نے خاوند کے چلے جانے کے بعد کچھ دنوں تو کسی نہ کسی طرح گزارا کیا ۔ مگر جب فاقوں کی نوبت آگئی تو مجبور ہوکر اس بے چاری نے وزیر کے محل میں جھاڑو کشی کی نوکری کرلی۔ اور اپنے بچوں کا پیٹ پالنے لگی۔ ایک شب لکڑہارن نے خواب میں دیکھا کہ میں وزیر کے محل میں جھاڑو دے رہی ہوں کہ اتنے میں مولائے کائنات حضرت امام جعفر صادقؑ چند اصحاب کے ساتھ صحن خانہ میں تشریف لائے ، پھر اپنے اصحاب کی متوجہ ہو کر فرمایا کہ معلوم ہے آج کون سی تاریخ اور کون سا مہینہ ہے؟ اصحاب نے نہایت ادب سے عرض کیا، مولا! آج شبِ بائیس ۲۲ رجب المرجب ہے۔ تب حضرت نے اپنی زبان معجز بیان سے اِرشاد فرمایا! اگر کوئی مشکل میں ہو یا اور کسی پریشانی میں مبتلا ہو۔ بصدق دِل سوا سیر میدہ کی پوریاں (اگر مقدور ہو شیریں پوریاں) پکا کر دو (2) کونڈوں میں رکھ کر ہمارے نام کی نذر (نیاز) (22) رجب المرجب بوقت نمازِ صبح، دلواکر اللہ تعالیٰ کی بارگاہ میں ہمارے ’’واسطے‘‘ سے اپنی حاجت طلب کرے۔ انشاء اللہ تعالیٰ مراد ضرور پوری ہوگی۔
اتنے میں لکڑہارن کی آنکھ کھل گئی۔ پھر اُسی وقت اُس نے بصدقِ دل نَذْر دینے کی نیت کی اور حسب الارشاد امامؑ عالی مقام نذر پیش کی۔ اب ذرا ادھر لکڑہارے کا حال سُنیے!
یہاں تو (22) رجب المرجّب بوقت صبح یہ لکڑہارن نذرِ امامؑ دلا رہی تھی اور وہاں لکڑہارا، درخت پر چڑھا ہوا لکڑی کاٹ رہا تھا کہ اچانک اُس کے ہاتھ سے کلہاڑی چھوٹ کر زمین پر گری۔ اُس نے درخت سے اُتر کر کلہاڑی اُٹھانے لگا تو اُسے زمین میں کوئی شئے دفن ہونے کا شبیہ ہوا۔ تو اُس نے اُس جگہ کو کھودا تو بہت بڑا خزانہ دکھائی دیا۔ تھوڑا مال لے کر اُس وقت تو بند کردیا۔ مگر تھوڑا تھوڑا کرکے کچھ عرصہ میں دفینہ کا ایک بڑا حصہ نکال لایا۔اور پھر سامانِ سفر تیار کرکے بڑے کرّ و فر کے ساتھ عازم وطن ہوا۔
گھر پر پہنچ کر اپنے اور بال بچوں کے لئے ایک عالیشان مکان بنوایا، بیوی بچوں کے آرام و آسائش کے سامان مہیا کئے۔ اور زندگی نہایت آسودگی سے بسر کرنے لگا۔ ایک روز لکڑہارن نے اپنے خاوند کی نذرِ امامؑ کی ساری سرگزشت بیان کی۔ جب اُس نے مہینہ اور تاریخ بتایا تو وہی مہینہ اور وہی تاریخ تھی، جب لکڑہارے کو ’’دَفینہ‘‘ ملا تھا۔ چنانچہ یہ سُن کر لکڑہارا بڑا متاثر ہوا اور صدقِ دل سے ایمان لانا۔ اور یہ نذر تاریخ مقررّہ پر برابر دلاتا رہا۔
ایک دفعہ وزیر کی بیوی اپنے بالا خانہ پر چڑھی۔ اس کو کچھ دور پر ایک عالیشان مکان نظر آیا، ساتھ کنیزیں بھی تھیں۔ اس نے ایک کنیز سے اس مکان کی طرف اِشارہ کرتے ہوئے پوچھا۔ یہ کس کا مکان ہے؟ کنیز نے جواب میں بتایا اُسی لکڑہارن کا مکان ہے جو کئی سال پیشتر حضور کے یہاں جھاڑو دینے پر ملازم تھی، یہ سن کر وزیر کی بیوی نے لکڑہارن کو بُلواکر مفصّل حالات دریافت کئے۔ لکڑہارن نے سارا حال بیان کردیا۔ جس میں اپنا خواب اور کونڈوں پر نذرِ امامؑ بھی تھا۔ وزیر کی بیوی کو کچھ بھی یقین نہ ہوا۔ بلکہ دِل میں یہ خیال آیا کہ یہ سب جھوٹ ہے ۔ اس کے شوہر نے کہیں چوری یا رَہزنی کی ہے، جس کی بدولت مالدار ہوگئی ہے۔ یہ مجھ سے چھپاتی ہے۔ وزیر کی بیگم کا یہ خیال فاسد دِل میں آنا تھا کہ اُسکے شوہر نامداء وزیرِ اعظم پر مصیبت ناگہانی آگئی۔
بادشاہِ وقت کا نائب وزیر اس کا دُشمن تھا۔ اُس نے موقع پاکر بادشاہ سے اس کی چُغلی کر دی کہ وزیر اعظیم خائن ہے۔ اس لئے شاہی خزانے میں بڑی خیانت کی ہے، جہاں پناہ اسے طلب فرمالیں۔ چنانچہ بادشاہ نے اُسی وقت وزیراعظم کو بلا کر حساب طلب کیا تو وہ صحیح حساب نہ دے سکا۔ بادشاہ غضبناک ہوگیا اور وزیراعظم کا سارا مال و اسباب ضبط کرکے اس کو اور اس کی بیوی دونوں کو نکال باہر کیا۔ وہ دونوں محل سے نکل کر چل دئیے۔ چلتے چلتے اثنائے راہ خربوزہ خرید کر رومال میں باندھ لئے کہ کہیں بیٹھ کر کھائیں گے۔
جس روز وزیر اعظیم پر عتاب آیا تھا، اِتفاق سے اُسی دن صبح کو شہزادہ شکار کو گیا تھا اور شام تک واپس نہ آیا تھا۔ بادشاہ پریشان ہوا،وہی نائب وزیر جس کی وجہ سے وزیر اعظم نکالا گیا، بادشاہ سے بولا،مجھے ایسا معلوم ہوتا ہے کہ معزول وزیر اعظم نے بوجہ دشمنی موقع پاکر شہزادے کو نقصان نہ پہنچا دیا ہو۔یہ سُن کر بادشاہ نے وزیراعظم (معتوب) کی گرفتاری کا حکم دے دیا۔ سپاہی ہر طرف دوڑ گئے اور گرفتار کرکے بادشاہ کے سامنے پیش کردیا۔ اس وقت تک انہوں نے وہ خربوزہ کھایا نہ تھا اسی طرح رومال میں بندھا ہوا تھا۔
بادشاہ نے دریافت کیا، رومال میں کیا ہے؟ معتوب وزیراعظم نے جواب دیا، خربوزہ ہے۔ رومال کھولا تو اس میں شہزادے کا سر نظر آیا۔ بادشاہ اپنے بیٹے کا سر دیکھ کر بے حد غضبناک ہوا اور حکم دیا انہیں رات بھر قید میں رکھو صبح ان کو قتل کردینا۔
معتوب وزیر اعظم اور اس کی بیوی دونوں قید خانے میں بند کردئیے گئے۔ وزیراعظم معتوبہ نے بیوی سے پوچھا! یہ بات سمجھ میں نہیں آتی کہ ہم پر یہ ناگہانی مصیبت کیسے آئی، کون سا ایسا گناہ سرزَد ہوگیا۔ جس کی سزا بھگتنی پڑ گئی۔ کافی غور و خوض کے بعد بیوی نے کہا میرا خیال ہے کہ لکڑہارن نے نَذْر اور حکمِ امام جعفر صادقؑ نیز دَفینہ کے متعلق تفصیل سے بیان کیا تھا ۔ میں اُس پر قطعی یقین نہ کیا اور جھوٹ پر محمول کیا۔ معتوب وزیراعظم نے جواب میں کہا، اس سے بڑھ کر اور کیا گناہ ہوگا۔ تم نے حضرت امام جعفر صادقؑ کے قول و حکم کو جھٹلایا، توبہ کرو، اور معافی مانگو۔ امام عالیؑ مقام کا فرمانا درست ہے۔
اَلغرض دونوں رات بھر گریہ وزاری اور اپنے گناہوں کی معافی مانگتے رہے۔ خلوصِ دِل سے نذرِ امامؑ کی منت مانی۔ اللہ تعالیٰ نے توبہ قبول کرلی۔ عَلَی الصّبح شہزادہ شکار سے واپس آیا اور بادشاہ کی خدمت میں حاضر ہوا۔ بادشاہ نے بیٹے کو سینے سے لگایا ، پھر واپسی کی تاخیر کا سبب دریافت کیا۔ شہزادے نے عرض کیا حضور! شکار میں بڑی دیر ہوچکی تھی ، لہٰذا ایک باغ میں ٹھہر گیا تھا۔
اس کے بعد دونوں قیدیوں (معتوب وزیراعظم اور اُس کی بیوی) کو طلب کیا، پھر رومال کو کھلوا کر دیکھا تو وہ خربوزہ تھا۔ بادشاہ سخت متعجب ہوا۔ اور وزیر اعظم سے دریافت کیا کہ یہ کیا معاملہ ہے۔ معتوب وزیراعظم نے جو واقعہ اپنی بیوی سے سُنا تھا، نہایت تفصیل بیان کردیا۔ پھر بادشاہ نے لکڑہارہ اور اس کی عورت کو بُلوا کر پوچھ گچھ کی، اُنہوں نے بھی اوّل سے آخر تک بیان کردیا۔ یہ سُن کر بادشاہ بھی بہ صدِقِ دِل ایمان لے آیا۔ اور معتوب وزیر اعظم کو بحال کرکے دوبارہ اُس کے عہدہ پر اُس کو فائز کیا۔ اور چُغل خور وزیر کو معتوب کرکے شہر بدر کردیا۔