معجزہ حضرت عباسؑ علمدارؑ (بارہواں معجزہ)
آقائے برجندی مرحوم ’’کتاب اَسرارُ الشّہادۃ‘‘ میں تحریر فرماتے ہیں، مجھے اس زمانے میں بعض معتبر لوگوں سے معلوم ہوا ہے کہ ایک مومن دیندار جو ابھی تک موجود ہے
(آقائے برجندی کے زمانے میں یہ شخص موجود تھا)۔
وہ حضرت امام حسینؑ کی ہر روز زیارت کیا کرتا تھا۔ مگر حضرت ابوالفضل العباسؑ کی زیارت کو ہفتہ میں صرف ایک بار جایا کرتا تھا۔ اِس مرد مومن نے ایک مرتبہ جناب فاطمۃ الزّہراؑ سلام اللہ علیہا کو خواب میں دیکھا کہ میں نے آپؑ کے سامنے حاضر ہوکر نہایت اَدب سے سلام کیا۔ لیکن انہوں نے اپنے رُخ کو پھیر لیا۔ میں نے عرض کیا، شہزادیٔ کونین، میرے ماں باپ آپؑ پر سے فدا ہوں، آپؑ مجھ سے کس خطا پر ناراض ہیں؟
خاتونِ جنّت نے ارشاد فرمایا: میں تجھ سے اس لئے ناراض ہوں کہ تو میرے ایک فرزند کی زیارت نہیں کرتا۔ میں نے عرض کی کہ اَے مخدومہِؑ عالم! میں تو روزانہ زیارت سے مشّرف ہوتا ہوں۔ بنتِ رسولؐ خدا نے فرمایا: ہاں۔
تذرین بنی الحسین ولا تذرین بنی العباسؑ إلا قلیلاً
تو میرے بیٹے حسینؑ کی زیارت تو روز کرتا ہے مگر میرے بیٹے عباسؑ کی زیارت کو بہت کم جاتا ہے۔ تیری یہ بات ہم کو ناپسند ہے۔