حضرت امیرالمؤمنینؑ علی ابنِ ابی طالبؑ کا معجزہ (تیسرا معجزہ) — عربی متن مع اردو ترجمہ | سادات
Skip to content

حضرت امیرالمؤمنینؑ علی ابنِ ابی طالبؑ کا معجزہ (تیسرا معجزہ)

16 مُعْجِزے

حضرت امیرالمؤمنینؑ علی ابنِ ابی طالبؑ کا معجزہ (تیسرا معجزہ)

مشہور ہے کہ کسی شہر میں ایک غریب اور کثیر العیال لکڑہارا رہتا تھا۔ ہر روز جنگل جاتا، لکڑیاں کاٹتا اور شہر میں لاکر فروخت کرتا اور بچوں کا پیٹ پالتا۔ ایک روز لکڑیاں نہیں فروخت ہوئیں، رات ہوگئی خیال کیا کہ خالی ہاتھ کیا گھر جاؤں، بچے بھوک سے بے قرار ہوں گے، اُن کی بے چینی دیکھ کر اور صدمہ ہوگا، بہتر ہے کہ رات اِسی جگہ بسر کروں ، صبح کو لکڑیاں فروخت کرکے گھر جاؤں، اس کا بیان ہے کہ میں وہیں رہ گیا۔ نصف شب کو ایک سوار منہ پر نقاب ڈالے قبلہ کی طرف سے نمودار ہوا۔ اور میری حالت دریافت کی اور مجھ پر شفقت فرما کر پانچ پیسے عطاکئے اور فرمایا: ان پیسوں سے شیرینی خرید کر مولائے کونین، مشکل کشاؑئے دارین کا فاتحہ (نذر) دے۔ خداوند رحیم و کریم اسکی برکت سے تیرا افلاس دور کردے گا۔

لکڑہارے نے وہ پیسے خوش ہوکر رکھ لئے۔ اُسی وقت اُس پر غنودگی طاری ہوئی۔ پھر آنکھ کھلی تو کیا دیکھا کہ اپنے گھر میں کھڑا ہے اور لکڑیوں کا گٹھّا صحن میں پڑا ہے۔ اُس نے اپنی زوجہ کو بیدار کیا اور شب کی تمام کیفیت بیان کی اور کہا کہ امیرالمومنین ؑمولائے مشکل کشاءؑ کے نام کی فاتحہ دِلوانے کا انتظام کرو پھر دونوں میاں بیوی نے نہا دھو کر فاتحہ کے لئے شیرینی مہیا کی حضرت امیر المومنینؑ کی نذر دے کر خود بھی کھایا اور بچوں کو بھی کھلایا۔ اس روز اِس کی لکڑیوں کا گٹھا دوگنی قیمت پر فروخت ہوا۔

دوسرے روز لکڑہارا اپنی عادت کے مطابق لکڑیاں کاٹنے جنگل گیا ، اور ایک خشک درخت دیکھا، ’’بسم اللہ‘‘ کہہ کر کلہاڑی کا ایک ہاتھ مارا تو وہ ٹوٹ ہوگیا۔ دوسری ضرب ’’یا علیؑ‘‘ کہہ کر ماری تو وہ درخت جڑ سمیت گِر پڑا تو اس کی جڑ میں سے ایک خزانہ ظاہر ہوا۔ لکڑہارا اُسے دیکھ کر بہت خوش ہوا۔ اور سجدۂ شکر بجا لایا۔ پھر اُس میں سے چند اشرفیاں لے کر بازار گیا اور کھانے پینے کی چیزیں لے کر گھر گیا۔ دوسرے روز گھروالوں کو لے کر اُس درخت کے پاس آیا اور اسی جنگل کو خرید کر وہاں ایک خوبصورت اور عالیشان محل بنوایا اور جا بجا مسافرخانے اور آبدار خانے تعمیر کرائے اور لنگر خانے جاری کئے اور بہت سے ملازموں کو اُنکی دیکھ بھال پر مقرر کیا۔

ایک دن اُس شہر کا حاکم بغرضِ شکار اس جنگل کی طرف آنکلا، پیاس سے بے قرار ہوکر خدمت گاروں کو پانی لانے کا حکم دیا۔ خدمت گار پانی کی تلاش میں ہر طرف پھیل گئے۔ اِتفاقاً ایک ملازم کا گزر اُس لکڑہارے کے محل کی طرف ہوا۔ حاکم کے ملازم نے وہاں کے آدمیوں سے پانی طلب کیا، انہوں نے ایک صراحی اور ایک پیالہ اس کے حوالے کیا ۔ وہ لے کر حاکم کے پاس آیا۔ اُس نے پانی پیا، مگر اِنتہائی تعجب سے صراحی ، اور پیالے کو دیکھا، پھر اپنے ملازم سے دریافت کیا کہ اِس جنگل میں یہ نفیس صراحی اور یہ خوشگوار پانی کہاں سے دستیاب ہوا۔ ملازم نے عرض کی، حضور! ایک سال کا عرصہ ہوا کہ ایک لکڑہارے نے اِس جنگل میں شہر بسایا ہے۔ اپنا محل بنوایا اور پھر جا بجا مسافر خانے اور آبدار خانے بنوادیئے ہیں اور مسافروں ، غریبوں ، محتاجوں اور حاجتمندوں کو مالا مال کردیا ہے۔ یہ پانی، صراحی اور پیالہ اُس کے یہاں سے لایا ہوں۔ حاکم کو بہت حیرت ہوئی اور کہا ہم نے تو اس جنگل میں کبھی کسی بستی کا کوئی نشان تک نہ دیکھا تھا۔ اس حاکم نے حکم دیا کہ لکڑہارے کو معہ اہل و عیال حاضر کرو۔ اُس کے ہمراہیوں نے حاکم کو سمجھایا کہ ایسے نیک اور صالح آدمی کو یوں طلب کرنا مناسب نہیں۔ غرض وہ حاکم اپنی دولتِ سرا کو واپس آیا اور تمام واردات اپنی بیگم سے بیان کی۔ بیگم نے بھی لکڑہارے اور اُس کی زوجہ کو بلوانے کو خواہش ظاہر کی۔ حاکم نے دونوں کو طلب کیا۔ لکڑہارے نے حاکم اور اُس کی بیگم کو اشرفیاں نذر کیں۔ حاکم نے ان دونوں کو اپنے ساتھ رہنے کی خواہش کی اور وہ اُسی کے پاس خوشی سے رہنے لگے۔

ایک روز بیگم نے حمام جاتے وقت اپنا ’’نولکھا ہار‘‘ اپنے گلے سے اُتار کر کھونٹی پر لٹکادیا اور لکڑہارے کی زوجہ کو حفاظت کی تاکید کی۔ خدا کی شان کہ وہ کھونٹی ہار نگل گئی اور وہ حیرت سے دیکھتی رہی، حاکم کی بیگم نے حمّام سے فارغ ہوکر ہار کو نہ پایا تو اُس سے دریافت کیا، اُس نے جو دیکھا تھا کہہ دیا۔ حاکم کی بیگم کو یقین نہ آیا۔ اپنے شوہر سے شکایت کی۔ اس نے لکڑہارے اور اسکی زوجہ دونوں کو قید کردیا۔ اور اسی حال میں دونوں کئی عرصہ تک رہے۔

ایک رات پھر وہی سوار خواب میں آئے اور پوچھا کہ ’’اے لکڑہارے کیا تو امیر المومنین حضرت علی علیہ السلام کی نیاز کراتا تھا؟

دونوں نے عرض کی، نہیں۔ سوار نے فرمایا: یہی سبب ہے کہ تم اس بلا میں گرفتار ہوئے ہو۔ اب فاتحہ دِلوادو۔ لکڑہارے نے عرض کی، ہمارے پاس پیسے نہیں ہیں۔ فرمایا، تیرے بستر کے نیچے ہیں، لکڑہارا خواب سے چونک پڑا، اور پیسے اُٹھالئے، دونوں کے ہاتھوں اور پیروں کی زنجیریں بھی کھلی ہوئی تھیں۔ صبح ہوئی تو دیکھا کہ ایک ضعیفہ جارہی ہے، ان دونوں نے اس سے التجا کی کہ امیرالمومنین حضرت مشکل کشاءؑ کی نذر کے لئے شیرینی لادے۔ اُس بڑھیا نے کہا۔ آج میرے بیٹے کی شادی ہے مجھے بہت سے کام ہیں میں نہیں لاسکتی۔

اِتفاقاً ایک دوسری ضعیفہ کا گزر ہوا جس کا جوان فرزند مرگیا تھا، وہ روتی ہوئی جارہی تھی۔ ان دونوں (لکڑہارے اور اس کی زوجہ) نے اس سے شیرینی خرید کر لادینے کی خواہش ظاہر کی۔ بڑُھیا نے امیرالمؤمنینؑ کا نام سُنتے ہی رضا مندی کا اظہار کیا، اور بلا کسی حیلے اور عذر کے شیرینی لا کر بازار سے دے دی، لکڑہارے نے حضرت مشکل کشاءؑ کی نذر کی ، خود بھی کھایا اور بڑھیا کو بھی کھلایا۔ وہ ضعیفہ جب اپنے گھر واپس آئی تو اپنے بیٹے کو زندہ پایا، اور وہ ضعیفہ جب اپنے گھر واپس گئی، جس کے بیٹے کی شادی تھی اور اس نے برائے نذر امیرالمومنین شیرینی خرید کر بازار سے لانے کے لئے اِنکار کردیا تھا تو اُسکا فرزند یکایک مرگیا۔ یہ خبر مشہور ہوئی تو اس بڑھیا نے جس کا بیٹا یکایک مرگیا تھا، اس بڑھیا سے جس کا مرا ہوا بیٹا زندہ ہوگیا تھا اس سے مرے ہوئے بیٹے کے زندہ ہونے کا سبب پوچھا، اُس نے کہا اور کوئی سبب تو مجھے معلوم نہیں۔ البتہ ایک قیدی کی خواہش پر مولائے کونین حضرت مشکل کشاء کی نذر کا سامان بازار سے لاکر دیا تھا۔ اور جب نذر کا سامان مجبور قیدی کو دے کر واپس گھر آئی تو میں نے اپنے لڑکے کو زندہ پایا۔ یہ سن کر وہ بڑھیا اپنے دل میں نادم ہوئی اور توبہ کرکے صدق دِل سے نیت کی کہ اگر میرا بیٹا بھی زندہ ہوجائے تو میں بھی فاتحہ دلائوں گی۔ خدا نے اپنی رحمت سے اس کو زندہ کیا اور ادھر اس کھونٹی نے بھی ہار اُگلنا شروع کیا۔ یہ حال دیکھ کر حاکم کی بیگم نے اپنی آنکھوں سے دیکھا واقعہ حاکم کو سنایا تب اس کو بھی یقین آگیا، اور کہا کہ لکڑہارا اور اُس کی زوجہ کو میں نے بے قصور قید کردیا تھا۔ لہٰذا اس نے فوراً اسی وقت لکڑہارے اور اسکی زوجہ کی رہائی کا حکم دیا۔ رہائی پاکر دونوں حاکم کے سامنے حاضر ہوئے تو ان سے پوچھا کہ تم نے ایسا کیا کام کیا کہ ایسی کرامتیں ظاہر ہوئیں۔ دونوں نے عرض کی ہم ہر پنج شنبہ (جمعرات) کو حضرت امیرالمؤمنینؑ کا فاتحہ (نذر) دلایاکرتے تھے۔ غفلت کے سبب سے کئی جمعرات کو نذر نہ دِلاسکے تھے جس کے نتیجے میں اس بلا میں مبتلا ہوئے۔ اب جبکہ اس نذر کو کیا ہے اسکی برکت سے خداوندکریم نے ہم دونوں کو قید سے نجات دی۔

لہٰذا جو شخص ہر پنجشنبہ (جمعرات) کو نذرِ مشکل کشاءؑ دلاتا رہے گا، وہ تمام آفاتِ ارضی و سماوی سے محفوظ رہے گا، اور اس کی عمر و رزق میں اضافہ ہوگا۔ اُسکے دشمن اور بدخواہ ہمیشہ مقہور رہیں گے۔ انشاء اللہ تعالیٰ۔

ترکیبِ نذر:

اوّل و آخرتین تین بار درود۔ سات مرتبہ سورہِ الحمد اور سات مرتبہ سورہ قل ھو اللہ احد پڑھے۔ اور کہے اِن سورتوں کے پڑھنے کا جو ثواب حاصل ہوا ہو۔ میں اس ثواب کو مشکل کشائے کونین حضرت امیرالمؤمنینؑ علی ابن ابی طالبؑ کو ہدیہ کرتا ہوں۔

کاؤنٹر، آڈیو اور آف لائن مطالعہ ایپ میں دستیاب ہے۔

سادات کو ساتھ رکھیں

مکمل تجربہ — آف لائن مطالعہ، آڈیو، یاد دہانیاں اور بک مارکس — ایپ میں ہے۔

Get it on Google Playجلد آ رہی ہےDownload on the App Store