حرزِ امام موسیٰ کاظمؑ
علی بن یقطین بن موسی بغدادی سے روایت ہے کہ امام موسیٰ کاظمؑ کے چند رشتہ دار آپؑ کے پاس بیٹھے تھے کہ کسی نے یہ خبر پہنچائی کہ خلافت عباسیہ کا چوتھا حکمران خلیفہ موسی الھادی، نے خاندانِ عصمت و طہارت کے بزرگوں خاص کر امام موسیٰ کاظمؑ کو قتل کرنے کا فیصلہ کیا یا امامؑ کو گرفتار کرنا چاہتا ہے امامؑ نے اپنے رشتہ داروں، متعلقین اور پیروکاروں سے پوچھا کہ اس بارے میں تمہاری کیا رائے ہے؟
انہوں نے کہا ہماری رائے ہے کہ آپؑ اس کی دسترس سے باہر ہوکر کہیں پوشیدہ ہو جائیں تاکہ اس کے شر سے محفوظ رہیں، اس وقت امامؑ نے مسکراتے ہوئے کعب بن مالک کے ایک شعر سے تمثیل کرنے کے بعد فرمایا: ڈرو مت کیونکہ عراق سے موصولہ اولین خط میں موسی بن مہدی کی موت کی خبر آئے گی؛ اور پھر وضاحت کرتے ہوئے فرمایا:
زَعَمَتْ سَخِینَةَ أَنْ سَتَغْلِبُ رَبَّهٰا ! فَلَیَغْلِبَنَّ مَغالِبَ الْغُلاَّبِ إلهِی کَمْ مِن عَدُوٍّ شَحَذَ لِی ظُبَةَ مُدْیَتِهِ وَأَرْهَفَ لِی شَبا حَدِّهِ وَدافَ لِی قَواتِلَ سُمُومِه وَلَمْ تَنَمْ عَنِّی عَیْنُ حِراسَتِهِ فَلَمَّا رَأَیْتَ ضَعْفِی عَنِ احْتِمالِ الْفَوادِحِ وَعَجْزِی عَنْ مُلِمَّاتِ الْجَوائِحِ صَرَفْتَ ذلِکَ عَنِّی بِحَوْلِکَ وَقُوَّتِکَ لاَ بِحَوْلٍ مِنِّی وَلاَ قُوَّةٍ فَأَلْقَیْتَهُ فِی الْحَفِیرِ الَّذِی احْتَفَرَهُ لِی خائِباً مِمَّا أَمَّلَهُ فِی الدُّنْیا مُتَباعِداً مِمَّا رَجاهُ فِی الْاَخِرَةِ، فَلَکَ الْحَمْدُ عَلَی ذلِکَ قَدْرَ اسْتِحْقاقِکَ سَیِّدِی اَللّٰهُمَّ فَخُذْهُ بِعِزَّتِکَ وَافْلُلْ حَدَّهُ عَنِّی بِقُدْرَتِکَ وَاجْعَلْ لَهُ شُغْلاً فِیما یَلِیهِ وَعَجْزاً عَمَّا یُناوِیهِ اَللّٰهُمَّ وَأَعْدِنِی عَلَیْهِ عَدْوَیً حاضِرَةً، تَکُونُ مِنْ غَیْظِی شِفائً وَمِنْ حَنَقِی عَلَیْهِ وقائً وَصِلِ اَللّٰهُمَّ دُعائِی بِالْاِجابَةِ، وَانْظِمْ شِکایَتِی بِالتَّغْیِیرِ وَعَرِّفْهُ عَمَّا قَلِیلٍ مَا أَوْعَدْتَ الظَّالِمِینَ وَعَرِّفْنِی وَعَدْتَ فِی إجابَةِ الْمُضْطَرِّینَ إنَّکَ ذُوالْفَضْلِ الْعَظِیم وَالْمَنِّ الْکَرِیمِ
ترجمہ: سخینہ کا گمان یہ تھا کہ وہ اپنے رب پر غالب رہے گی! لیکن خدا تو ہر غالب پر غالب رہتا ہے۔
پھر آپؑ نے اپنے ہاتھ آسمان کی طرف بلند کیے اور کہا:
میرے اللہ کتنے ہی دشمنوں نے میرے لیے چھری کی دھار تیز کی اور میرے لیے ہر تلوار کھینچی اور میرے لیے زہر قاتل گھول کر تیار کی لیکن میری نگہبانی کرنے والی آنکھ نہیں سوئی پس تو نے جب میری کمزوری دیکھی کہ میں ان ناگواریوں کو سہہ نہیں سکتا ان تباہ کن سختیوں کے سامنے عاجز ہوں تو نے ان سب کو اپنی طاقت سے برطرف کر دیا مجھ میں اتنی قوت و طاقت نہیں تھی پھر تو نے اسے اس گڑھے میں پھینکا جو اس نے میرے لیے کھودا وہ اپنی بات میں ناکام رہا اس دنیا میں اور آخرت میں بھی نامراد ہی رہا پس تیرے لیے حمد ہے اس مہربانی پر اے میرے آقا جتنی حمد تیری شان کے لائق ہے اے معبود اپنے غلبے کے ساتھ اسے پکڑلے اور اپنی قدرت سے اسکی تلوار کو مجھ سے ہٹا دے تو اسے کسی طرف لگا دے کہ اسی میں لگا رہے اور اس چیز میں عاجز کر دے جو وہ چاہتا ہے اے معبود تو میری طرف سے اس پر فوری شورش مسلط کر دے کہ جس سے میرا غصہ ٹھنڈا ہو جائے اور وہ مجھے دبوچنے سے باز آ جائے اے معبود میری دعا کو قبولیت سے ہمکنار فرما دے میری شکایت کے دور ہونے کا بندوبست فرما اسے جلد اس چیز سے آشنا کر دے جس کی تو نے ظالموں کو دھمکی دی ہےاور مجھے اس چیز سے آگاہ کر جس کے ذریعے تو نے بے چاروں کی دعا قبول کرنے کا وعدہ کیا ہے بے شک تو بڑے فضل کا مالک اور بہترین احسان کرنے والا ہے۔
پس وہ لوگ اٹھ کر چلے گئے اور دوبارہ جمع نہ ہوئے مگر اس مقصد سے کہ عباسی خلیفہ موسی بن مہدی کی خبر مرگ کا پروانہ پڑھیں۔
(مجلسی، بحارالانوار، جلد 91، صفحہ 319؛ قمی، مفاتیح الجنان، صفحہ 184)