حرزِ امام علی رضاؑ — عربی متن مع اردو ترجمہ | سادات
Skip to content

حرزِ امام علی رضاؑ

شِفا کی دُعائیں

حرزِ امام علی رضاؑ

یہ امام علی رضاؑ کا حرز ہے، ساتویں عباسی خلیفہ مامون رشید ملعون کے خدمت گار یاسر سے روایت ہے: جب امامؑ، حمید بن قحطبہ (یہ عباسی دور کے فوجی سرداروں میں سے تھا اسے جزیرہ عراق و شام کے درمیان کے علاقہ کا گورنر مقرر کیا گیا تھا) کے محل میں تشریف لے گئے تو وہاں اپنا لباس اتارا اور حمید کے حوالے کیا۔ حمید نے وہ لباس اپنی لونڈی کو دے دیا کہ اسے دھوئے۔ تھوڑی دیر کے بعد وہ واپس آئی تو اس کے ہاتھ میں ایک رقعہ تھا جو اس نے حمید کو دیا اور کہا کہ یہ رقعہ میں نے ابوالحسنؑ کی جیب سے نکالا ہے اس پر حمید نے امامؑ سے کہا:

قربان جائوں اس لونڈی کو آپؑ کے لباس میں سے ایک رقعہ ملا ہے آپؑ نے فرمایا:

یہ وہ تعویذ ہے جسے میں ہمیشہ اپنے پاس میں رکھتا ہوں۔

حمید نے عرض کیا، کیا ممکن ہے کہ آپؑ ہمیں بھی اس سے شرف عطا فرمائیں؟

امامؑ نے فرمایا: یہ وہ تعویذ ہے کہ جو شخص اسے اپنے گردن میں رکھے گا، بلائیں مصیبتیں اس سے دور ہو جائیں گی۔ یہ تعویذ راندے ہوئے شیطان سے بچانے والا ہے۔ پھر آپؑ نے حمید کے سامنے اس تعویذ کو پڑھا اور وہ تعویذ یہ ہے

بِسْمِ اللہ الرَّحْمٰنِ الرَّحِیمِ بِسْمِ اللہ إنِّی أَعُوذُ بِالرَّحْمٰن مِنْکَ إنْ کُنْتَ تَقِیّاً أَوْ غَیْرَ تَقِیٍّ أَخَذْتُ بِالله السَّمِیعِ الْبَصِیرِ عَلَی سَمْعِکَ وَبَصَرِکَ لاَ سُلْطانَ لَکَ عَلَیَّ وَلاَ عَلَی سَمْعِی وَلاَ عَلَی بَصَرِی وَلاَ عَلَی شَعْرِی وَلاَ عَلَی بَشَرِی وَلاَ عَلَی لَحْمِی وَلاَ عَلَی دَمِی، وَلاَ عَلَی مُخِّی وَلاَ عَلَی عَصَبِی وَلاَ عَلَی عِظامِی وَلاَ عَلَی مَالِی، وَلاَ عَلَی مَا رَزَقَنِی رَبِّی سَتَرْتُ بَیْنِی وَبَیْنَکَ بِسِتْرِ النُّبُوَّةِ الَّذِی اسْتَتَرَ أَنْبِیاءُ اللّٰهِ بِهِ مِنْ سَطَوَاتِ الْجَبَابِرَةِ وَالْفَرَاعِنَةِ جِبْرَآئِیْلُ عَنْ یَمِینِی وَمِیکائِیلُ عَنْ یَسارِی وَ إسْرافِیلُ عَنْ وَرائِی، وَ مُحَمَّدٌ صَلَّی اللّٰهُ عَلَیْهِ وَآلِهِ أَمَامِی، وَاللہ مُطَّلِعٌ عَلَیَّ یَمْنَعُکَ مِنِّی وَیَمْنَعُ الشَّیْطانَ مِنِّی اَللّٰهُمَّ لاَ یَغْلِبُ جَهْلُهُ أَنَاتَکَ أَنْی وَیَسْتَخِفَّنِی اَللّٰهُمَّ إلَیْکَ الْتَجَأْتُ اَللّٰهُمَّ إلَیْکَ الْتَجَأْتُ اَللّٰهُمَّ إلَیْکَ الْتَجَأْتُ

ترجمہ: اللہ کے اسم سے جو بڑا رحم والا مہربان ہے اللہ کے اسم سے، بے شک میں تجھ سے خدا کی پناہ لیتا ہوں اگر تو پرہیزگار ہے یا پرہیزگار نہیں ہے میں نے سننے دیکھنے والے خدا کے ذریعے سے تیرے کانوں اور آنکھوں کو باندھ دیا ہے اب نہ مجھ پر تیرا کوئی بس ہے نہ میرے کانوں پر نہ میری آنکھوں پر نہ میرے بالوں پر نہ میرے پوست پر نہ میرے گوشت پر نہ میرے خون پر نہ میرے مغز پر نہ میرے پٹھوں پر نہ میری ہڈیوں پر تیرا بس ہے نہ میرے مال پر اور نہ میرے رب کی دی ہوئی چیزوں پر تیرا کوئی بس ہے میں نے پردہ ڈال دیا ہے اپنے اور تیرے درمیان، نبوت کے پردے سے جس سے خدا کے نبیوں نے خود کو ڈھانپا تھا سخت گیروں اور فرعونوں کے حملوں سے چنانچہ جبرائیلؑ میری داہنی طرف اور میکائیلؑ میری بائیں طرف اسرافیلؑ میری پچھلی طرف اور محمد رسول اللہ صلی اللہ علیہ و آلہ میرے آگے ہیں، خدا میرا نگہدار ہے وہ مجھے تجھ سے دور کرے گا اور شیطان کو مجھ سے ہٹائے گا اے معبود اس کی نادانی تیرے حوصلے پر غالب نہ ہو کہ وہ مجھ پر چڑھ آئے اور مجھے خوار کرے اے معبود میں تیری پناہ میں ہوں اے معبود میں تیری پناہ میں ہوں اے معبود میں تیری پناہ میں ہوں۔

اس حرز کیلئے ایک عجیب حکایت بیان کی گئی ہے جسے عبد السلام بن صالح (جو خواجہ ابا صلت ہرَوی کے نام سے معروف ہیں، امام علی رضاؑ کے خاص اصحاب میں سے تھے) نے نقل کیا ہے ابو صلت کہتے ہیں:

کہ میرے مولا امام علی رضاؑ ایک روز اپنے مکان میں تشریف رکھتے تھے کہ اتنے میں ساتویں عباسی خلیفہ مامون الرشید ملعون کا قاصد آپؑ کی خدمت میں حاضر ہوا اور کہنے لگا کہ خلیفہ آپؑ کو بلا رہے ہیں، امامؑ اٹھے اور مجھ سے فرمایا کہ اس وقت وہ مجھے ایک سخت امر کے لیے بلوا رہا ہے لیکن قسم بخدا کہ وہ مجھے کوئی نقصان نہیں پہنچا سکتا بوجہ ان کلمات کے جو میرے جد بزرگوارؐ حضرت رسولِؐ خدا سے ملے ہیں۔

ابو صلت کا بیان ہے کہ امامؑ کے ساتھ میں بھی خلیفہ مامون کے پاس گیا جب امامؑ کی نگاہ مامون پر پڑی تو آپؑ نے یہ حرز تا آخر پڑھا۔ پس جب آپؑ اس کے سامنے جا کھڑے ہوئے تو مامون نے آپؑ کی طرف دیکھ کر کہا: ابوالحسنؑ میں نے اپنے لوگوں کو حکم دیا ہے کہ وہ آپؑ کو ایک لاکھ درہم دیں اور آپؑ اپنی مزید ضروریات بھی لکھ دیں پھر جب امامؑ واپس ہوئے تو مامون نے آپؑ کے پسِ گردن نگاہ ڈالی اور کہا میں نے ارادہ کیا اور خدا نے بھی ارادہ کیا تاہم خدا کا ارادہ بہت بہتر تھا۔

کاؤنٹر، آڈیو اور آف لائن مطالعہ ایپ میں دستیاب ہے۔

سادات کو ساتھ رکھیں

مکمل تجربہ — آف لائن مطالعہ، آڈیو، یاد دہانیاں اور بک مارکس — ایپ میں ہے۔

Get it on Google Playجلد آ رہی ہےDownload on the App Store