Həzrət Fatimeyi-Zəhra (ə) namazı — ərəb mətni və tərcümə | Sadaat
Skip to content

Həzrət Fatimeyi-Zəhra (ə) namazı

Xüsusi namazlar

Həzrət Fatimeyi-Zəhra (ə) namazı

Həzrət Fatimeyi-Zəhraya (ə) iki müstəhəb namaz aid edilir. Birincisi iki rəkətlidir: rəvayətə görə onu Cəbrayıl (ə) öyrətmiş və Həzrət Fatimə (ə) onu qılarmış; ikincisi dörd rəkətlidir və İmam Cəfər Sadiq (ə) onu cümə gününün ən yaxşı əməli adlandırıb. Məfatihül-cinanda hər ikisi cümə gününün əməlləri sırasında qeyd olunub.

Birinci namaz — iki rəkət

Qaydası

  1. Birinci rəkət: Həmd surəsi bir dəfə, sonra Qədr surəsi 100 dəfə.

  2. İkinci rəkət: Həmd surəsi bir dəfə, sonra İxlas (Tövhid) surəsi 100 dəfə, sonra təşəhhüd və salam.

Rüku və səcdələr adi qaydadadır. Niyyət qəlbin qəsdidir: «Həzrət Fatimə (ə) namazından iki rəkət qılıram, qürbətən iləllah»; onu dillə demək lazım deyil.

Salamdan sonrakı təsbih

Rəvayət olunur ki, Həzrət Fatimə (ə) namazı bitirdikdən sonra bunu deyərdi:

سُبْحَانَ ذِي الْعِزِّ الشَّامِخِ الْمُنِيْفِ سُبْحَانَ ذِي الْجَلَالِ الْبَاذِخِ الْعَظِيْمِ سُبْحَانَ ذِي الْمُلْكِ الْفَاخِرِ الْقَدِيْمِ سُبْحَانَ مَنْ لَبِسَ الْبَهْجَةَ وَالْجَمَالَ سُبْحَانَ مَنْ تَرَدَّى بِالنُّورِ وَالْوَقَارِ سُبْحَانَ مَنْ يَرَى أَثَرَ النَّمْلِ فِي الصَّفَا سُبْحَانَ مَنْ يَرَى وَقْعَ الطَّيْرِ فِي الْهَوَاءِ سُبْحَانَ مَنْ هُوَ هٰكَذَا لَا هٰكَذَا غَيْرُهُ

Pakdır uca və yüksək izzət sahibi. Pakdır ali və əzəmətli cəlal sahibi. Pakdır şərəfli və əzəli hökmranlıq sahibi. Pakdır O kəs ki, rövnəq və gözəllik libasını geyinmişdir. Pakdır O kəs ki, nur və vüqar ridasına bürünmüşdür. Pakdır O kəs ki, sərt qaya üzərində qarışqanın izini görür. Pakdır O kəs ki, quşun havada enişini görür. Pakdır O kəs ki, belədir və Ondan başqası belə deyil.

Bundan sonra

Seyyid ibn Tavus deyir ki, başqa bir rəvayətə görə bu namazdan sonra hər vacib namazdan sonra deyilən Həzrət Fatimə (ə) təsbihi deyilməli, sonra isə Məhəmmədə və Ali-Məhəmmədə 100 dəfə salavat göndərilməlidir.

Şeyx Tusi Misbahul-mütəhəccid kitabında bu namazı eyni qaydada yazıb buyurur ki, təsbihi bitirdikdən sonra namaz qılanın dizlərini və qollarını paltardan açması, səcdənin yeddi üzvünü birbaşa yerə qoyub səcdə etməsi, tam təvazö və acizliklə hacətlərini istəməsi və səcdədə ikən bu duanı oxuması müstəhəbdir:

يَا مَنْ لَيْسَ غَيْرَهُ رَبٌّ يُدْعٰى يَا مَنْ لَيْسَ فَوْقَهُ إِلٰهٌ يُخْشٰى يَا مَنْ لَيْسَ دُونَهُ مَلِكٌ يُتَّقٰى يَا مَنْ لَيْسَ لَهُ وَزِيْرٌ يُؤْتٰى يَا مَنْ لَيْسَ لَهُ حَاجِبٌ يُرْشٰى يَا مَنْ لَيْسَ لَهُ بَوَّابٌ يُغْشٰى يَا مَنْ لَا يَزْدَادُ عَلٰى كَثْرَةِ السُّؤَالِ إِلَّا كَرَمًا وَجُودًا وَعَلٰى كَثْرَةِ الذُّنُوبِ إِلَّا عَفْوًا وَصَفْحًا صَلِّ عَلٰى مُحَمَّدٍ وَآلِ مُحَمَّدٍ وَ افْعَلْ بِيْ كَذَا وَ كَذَا

Ey Ondan başqa çağırılacaq Rəbb olmayan! Ey Ondan üstün qorxulacaq məbud olmayan! Ey Ondan başqa çəkiniləcək hökmdar olmayan! Ey yanına (vasitəçilik üçün) gedilən vəziri olmayan! Ey rüşvət veriləcək pərdədarı olmayan! Ey qapısına gedilib gözlənilən qapıçısı olmayan! Ey istəklərin çoxluğu Onun yalnız kərəm və səxavətini, günahların çoxluğu isə yalnız əfv və güzəştini artıran! Məhəmmədə və Ali-Məhəmmədə salavat göndər və mənim üçün filan-filan işi et.

«Filan-filan» sözünün yerinə hacətlərinizi istəyin.

İkinci namaz — dörd rəkət (cümə səhəri)

Şeyx Tusi və Seyyid ibn Tavus Səfvandan rəvayət edirlər ki, Məhəmməd ibn Əli Hələbi cümə günü İmam Cəfər Sadiqin (ə) hüzuruna gəlib bu günün ən yaxşı əməlinin nə olduğunu soruşdu. İmam (ə) buyurdu ki, Rəsulullahın (s) yanında Fatimədən (ə) üstün heç kəs yox idi və onun Fatiməyə öyrətdiyindən daha yaxşı heç bir əməl yoxdur; sonra bu əməli bildirdi:

Cümə səhəri qüsl etsin, qibləyə üz tutub iki ayağını bərabər qoyaraq dursun və dörd rəkəti iki-iki (iki salamla) belə qılsın:

  1. Birinci rəkət: Həmd surəsi, sonra İxlas surəsi 50 dəfə.

  2. İkinci rəkət: Həmd surəsi, sonra Adiyat surəsi 50 dəfə; sonra təşəhhüd və salam.

  3. Üçüncü rəkət: Həmd surəsi, sonra Zəlzələ surəsi 50 dəfə.

  4. Dördüncü rəkət: Həmd surəsi, sonra Nəsr surəsi 50 dəfə — rəvayətə görə bu, nazil olan sonuncu surədir; sonra təşəhhüd və salam.

Namazı bitirdikdən sonra bu duanı oxuyun:

إِلَهِيْ وَ سَيِّدِيْ مَنْ تَهَيَّاَ اَوْ تَعَبّٰى اَوْ اَعَدَّ اَوِ اسْتَعَدَّ لِوِفَادَةِ مَخْلُوْقٍ رَجَاۤءَ رِفْدِهِ وَ فَوَاۤئِدِهِ وَ نَاۤئِلِهِ وَ فَوَاضِلِهِ وَ جَوَاۤئِزِهِ فَاِلَيْكَ يَاۤ إِلَهِيْ كَانَتْ تَهْيِئَتِيْ وَ تَعْبِئَتِيْ وَ اِعْدَادِيْ وَ اسْتِعْدَادِيْ رَجَاۤءَ فَوَاۤئِدِكَ وَ مَعْرُوْفِكَ وَ نَاۤئِلِكَ وَ جَوَاۤئِزِكَ فَلَا تُخَيِّبْنِيْ مِنْ ذٰلِكَ يَا مَنْ لَّا تَخِيْبُ عَلَيْهِ مَسْاَلَةُ السَّاۤئِلِ وَ لَا تَنْقُصُهُ عَطِيَّةُ نَاۤئِلٍ فَاِنِّيْ لَمْ اٰتِكَ بِعَمَلٍ صَالِحٍ قَدَّمْتُهُ وَ لَا شَفَاعَةِ مَخْلُوْقٍ رَجَوْتُهُ اَتَقَرَّبُ اِلَيْكَ بِشَفَاعَتِهِ اِلَّا مُحَمَّدًا وَ اَهْلَ بَيْتِهِ صَلَوَاتُكَ عَلَيْهِ وَ عَلَيْهِمْ، اَتَيْتُكَ اَرْجُوْ عَظِيْمَ عَفْوِكَ الَّذِيْ عُدْتَ بِهِ عَلَى الْخَطَّاۤئِيْنَ عِنْدَ عُكُوْفِهِمْ عَلَى الْمَحَارِمِ فَلَمْ يَمْنَعْكَ طُوْلُ عُكُوْفِهِمْ عَلَى الْمَحَارِمِ اَنْ جُدْتَ عَلَيْهِمْ بِالْمَغْفِرَةِ وَ اَنْتَ سَيِّدِي الْعَوَّادُ بِالنَّعْمَاۤءِ وَ اَنَا الْعَوَّادُ بِالْخَطَاۤءِ أَسْأَلُكَ بِحَقِّ مُحَمَّدٍ وَ اٰلِهِ الطَّاهِرِيْنَ اَنْ تَغْفِرَ لِيْ ذَنْبِيَ الْعَظِيْمَ فَاِنَّهُ لَا يَغْفِرُ الْعَظِيْمَ اِلَّا الْعَظِيْمُ يَا عَظِيْمُ يَا عَظِيْمُ يَا عَظِيْمُ يَا عَظِيْمُ يَا عَظِيْمُ يَا عَظِيْمُ يَا عَظِيْمُ

İlahi, Ağam! Kim bir məxluqun hüzuruna getmək üçün hazırlaşıb təchiz olunur, tədarük görüb özünü hazır edirsə, bunu onun bəxşişinə, faydalarına, ətasına, lütflərinə və mükafatlarına ümid edərək edir; ey İlahi, mənim hazırlaşmağım, təchizatım, tədarüküm və hazırlığım isə Sənin faydalarına, yaxşılığına, ətana və mükafatlarına ümid edərək yalnız Sənə doğrudur. Elə isə məni bundan naümid qaytarma, ey yanında istəyənin istəyi boşa çıxmayan və istəyənə verdiyi bəxşiş Ondan heç nə əskiltməyən! Mən Sənin hüzuruna qabaqcadan göndərdiyim bir saleh əməllə gəlməmişəm, şəfaəti ilə Sənə yaxınlaşmağa ümid etdiyim bir məxluqun şəfaəti ilə də gəlməmişəm — Məhəmməd və onun Əhli-beyti istisnadır, Sənin salavatın ona və onlara olsun. Günahkarlar haramlara bağlanıb qaldıqları vaxt onlara lütf etdiyin o böyük əfvinə ümid edərək gəlmişəm; onların uzun müddət haramlara bağlı qalmaları Səni onlara məğfirət bəxş etməkdən saxlamadı. Ey Ağam, Sən nemətləri təkrar-təkrar bəxş edənsən, mən isə təkrar-təkrar xətaya qayıdanam. Səndən Məhəmmədin və onun pak Alinin haqqı ilə istəyirəm ki, böyük günahımı bağışlayasan, çünki böyük günahı ancaq Əzəmətli olan bağışlayar. Ey Əzəmətli, ey Əzəmətli, ey Əzəmətli, ey Əzəmətli, ey Əzəmətli, ey Əzəmətli, ey Əzəmətli!

Bir neçə qeyd

  • Hər iki namaz müstəhəbdir; rəvayətlərinin sənədi barədə dəqiq məlumat yoxdursa, onları «rəcaən» (savab ümidi ilə) qılın — mərcələr belə əməllər barədə bunu tövsiyə edirlər.

  • Surələri saymaq üçün barmaqlardan və ya təsbehdən istifadə edə bilərsiniz.

Həzrət Fatimə (ə) təsbihinin qaydası: Namaz › Namaz qılma qaydası › “Həzrət Fatimə (ə) təsbihi və Şükür səcdəsi”

Mənbələr: Məfatihül-cinan (Şeyx Abbas Qumi), cümə gününün əməlləri, Həzrət Fatimə (ə) namazı; Misbahul-mütəhəccid (Şeyx Tusi); Cəmalül-üsbu (Seyyid ibn Tavus).

اَللّٰهُمَّ صَلِّ عَلٰى مُحَمَّدٍ وَّاٰلِ مُحَمَّدٍ

Sayğac, səs və oflayn oxu tətbiqdədir.

Sadaat-ı özünüzlə aparın

Tam təcrübə — oflayn oxu, səs, xatırlatmalar və əlfəcinlər — tətbiqdədir.

Get it on Google PlayTezlikləDownload on the App Store